សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់បេីករថយន្តម៉ាក Ford Ranger បត់ឆ្លងផ្លូវទៅបុកយុវជនម្នាក់កំពុងជិះម៉ូតូហុងដាឌ្រីម បណ្ដាលឱ្យដួលរងរបួស ឯម៉ូតូគាបជាប់ក្រោមរថយន្តរងការខូចខាតយ៉ាងដំណំ ។
ហេតុការណ៍គ្រោះថ្នាក់ចរាចរណ៍នេះបានកេីតឡេីងកាលពីវេលាម៉ោង១ និង៤០នាទីរំលងអធ្រាត្រ ឈានចូលថ្ងៃទី៣០ ខែធ្នូ ឆ្នាំ២០២២ នៅតាមបណ្ដោយផ្លូវព្រះនរោត្ដម កែងផ្លូវ៤៦២ ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ ។
តាមប្រភពព័ត៌មានពីកន្លែងកេីតហេតុ បានឱ្យដឹងថា នៅពេលកេីតហេតុ យុវជនម្នាក់បានជិះម៉ូតូមួយគ្រឿងម៉ាក ហុងដាឌ្រីម ស៊េរីឆ្នាំ២០២២ ពណ៌ខ្មៅ ពាក់ផ្លាកលេខ ភ្នំពេញ 1JQ-4209 ធ្វេីដំណេីរតាមបណ្ដោយផ្លូវព្រះនរោត្ដម ទិសដៅពីជេីងទៅត្បូង ខណៈមកដល់ចំណុចកេីតហេតុ ស្រាប់តែមានរថយន្តស៊េរីទំនេីបម៉ាក Ford Ranger ពណ៌ស ពាក់ផ្លាកលេខ ភ្នំពេញ 2BA-9692 បេីកបរដោយបុរសម្នាក់ធ្វេីដំណេីរតាមបណ្ដោយផ្លូវព្រះនរោត្ដម ទិសដៅពីត្បូងមកជេីង រួចបត់ឆ្វេងមកផ្លូវ៤៦២ ក៏បុកម៉ូតូហុងដាឌ្រីម ពីចំហៀងពេញទំហឹង បណ្ដាលឱ្យយុវជនម្នាក់ម្ចាស់ម៉ូតូរបួសត្រង់ក្បាលតិចតួច រីឯម៉ូតូគាបជាប់ក្រោមរថយន្តរងការខូចខាតយ៉ាងដំណំ ។
ក្រោយកេីតហេតុ សមត្ថកិច្ចមូលដ្ឋានបានចុះមកដល់ និងបានសម្រួលដល់ភាគីទាំងពីរឱ្យចចារគ្នាមួយជំហាន ។ បន្ទាប់មកភាគីទាំងសងខាងបានព្រមព្រៀងគ្នា ដោយតៃកុងរថយន្តFord Ranger ព្រមសងថ្លៃខូចខាតម៉ូតូ និងថ្លៃរបួសទៅលេីម្ចាស់ម៉ូតូចំនួន៣០០ដុល្លារ ដេីម្បីបញ្ចប់រឿងនៅនឹងកន្លែង ៕
ដោយ ៖ ភារ៉ា ដង្កោ
