សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់សង្ស័យស្រវឹងស្រា បានបេីករថយន្តឡិចសុីសRX450hក្នុងល្បឿនលឿនហេីយរេចង្កូតទៅបុកគល់ស្ពានអាកាសក្បាលថ្នល់រងការខូចខាតយ៉ាងដំណំ សំណាងដែរមិនបង្កឱ្យមនុស្សរងរបួស ។
ហេតុការណ៍គ្រោះថ្នាក់ចរាចរណ៍នេះបានកេីតឡេីងកាលពីវេលាម៉ោង១២ និង១០នាទីរំលងអធ្រាត្រ ឈានចូលថ្ងៃពុធ ទី៤ ខែមករា ឆ្នាំ២០២៣ នៅចំណុចគល់ស្ពានអាកាសក្បាលថ្នល់ផ្នែកខាងជេីង ទល់មុខអគ្គស្នងការនគរបាលជាតិ ស្ថិតក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ ។
បេីតាមប្រភពព័ត៌មានពីកន្លែងកេីតហេតុបានឱ្យដឹងថា មុនកេីតហេតុនោះគេឃេីញ រថយន្តម៉ាក ឡិចសុីសRX450h ពណ៌ស្ក ពាក់ស្លាកលេខ ខេមរភូមិន្ទ02 , 2-2504 បានធ្វេីដំណេីរតាមបណ្ដោយផ្លូវព្រះនរោត្ដម ទិសដៅពីជេីងមកត្បូងក្នុងល្បឿនលឿន ខណៈមកដល់ចំណុចកេីតហេតុ ស្រាប់តែជ្រុលទៅបុកគល់ស្ពានអាកាសក្បាលថ្នល់ចំពាក់កណ្ដាលរថយន្តផ្នែកខាងមុខពេញទំហឹង បណ្ដាលឱ្យរថយន្តខ្ទេចពីមុខយ៉ាងដំណំ ។ ភ្លាមនោះក៏មានបុរសម្នាក់ដែលជាតៃកុងរថយន្តបង្កបានបេីកទ្វារចុះពីរថយន្តស្ថានភាពទំនងជាស្រវឹងស្រា រួចចាកចេញពីកន្លែងកេីតហេតុទុកថយន្តចោល ។
ក្នុងករណីគ្រោះថ្នាក់ចរាចរណ៍ខាងលេីនេះ មិនបង្កឱ្យមនុស្សណាម្នាក់រងរបួសនោះឡេីយ ។
បន្ទាប់មកសមត្ថកិច្ចមូលដ្ឋានបានចុះមកដល់ និងទាក់ទងបន្តទៅជំនាញចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ឱ្យមកធ្វេីការវាស់វែងយករថយន្តបង្កទៅរក្សាទុក រង់ចាំដោះស្រាយគ្នាតាមច្បាប់ ៕
ដោយ ៖ ភារ៉ា ដង្កោ
