🔴មន្ត្រីនគរបាលពាក់ស័ក្តិ៣ម្នាក់​លួចមានស្រី​ ត្រូវប្រពន្ធតាមទាន់ដល់ក្នុងបន្ទប់ជួល រត់ផ្អើលពេញភូមិ

​    ភ្នំពេញ​ ៖​ មន្ត្រីនគរបាលពាក់ស័ក្តិ៣ម្នាក់បានលួចមានស្រីថ្មី​ ត្រូវប្រពន្ធតាមទាន់ដល់ក្នុងបន្ទប់ជួលនាំគ្នារត់ចែកជេីងគ្នាផ្អើលប្រជាពលរដ្ឋពេញភូមិ កាលពីវេលាម៉ោង១២យប់រំលងអធ្រាត្រឈានចូលថ្ងៃសុក្រ​ ទី៦ ខែមករា ឆ្នាំ២០២៣ នៅចំណុចបន្ទប់ជួលមួយកន្លែង ក្នុងភូមិទ្រុងវិមាន សង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ។

​    ស្ត្រីជាប្រពន្ធមានឈ្មោះ សុខ ថាវរី អាយុ២៩ឆ្នាំ មានទីលំនៅក្នុងភូមិបី ឃុំក្អមសំណ ស្រុកលើកដែក ខេត្តកណ្ដាល មានកូនស្រីម្នាក់រស់នៅក្នុងបន្ទុក។​ ចំណែកប្ដីដែលផិតក្បត់មានឈ្មោះ ប្រាក់ សុភារ៉ា អាយុ ៣៦ឆ្នាំ មុខរបរធ្វើប៉ូលិសពាក់ស័ក្តិ៣ ។

​    បេីតាមសម្ដីស្ត្រីជាប្រពន្ធបានប្រាប់ឲ្យដឹងថា គាត់នឹងប្ដីបានរួមរស់ជាមួយគ្នារយៈពេល៤ឆ្នាំកន្លងមកហើយ ដោយមិនបានរៀបការនឹងគ្នាទេ បានត្រឹមតែសែនព្រេន និងចុះអេតាស៊ីវិលនិងគ្នា និងមានកូនស្រីមួយនៅក្នុងបន្ទុក។​ ស្ត្រីជាប្រពន្ធបានបន្តទៀតថា រយៈពេល ៦ទៅ ៧ខែនេះ ការរស់នៅមិនចុះសម្រុងនឹងគ្នា ប្ដីធ្លាប់ប្រើហិង្សាមកលើរូបគាត់ និងមិនបានមកចូលផ្ទះញឹកញាប់ដូចមុននោះទេ ធ្វើឲ្យរូបគាត់ជាប្រពន្ធមានការសង្ស័យ ហើយក៏បានជួលគេឲ្យតាមដានប្តីរហូត ក្រោយមកមានផ្ដល់ដំណឹងថា ប្តីគាត់ តែងតែបើករថយន្តមួយគ្រឿងពាក់ស្លាកលេខនគរបាល មកជួបស្រីស្នេហ៍នៅក្នុងបន្ទប់ជួលជាញឹកញាប់។

​     ប្រភពដដែលបានបន្តទៀតថា កន្លងមកស្រីស្នេហ៍ប្ដី របស់គាត់ បានឆាតឌឺដងជាមួយគាត់រួចមកហើយ។ លុះដល់ថ្ងៃកើតហេតុខាងលើ រូបគាត់ក៏បាននាំម្ដាយនិងកូន ជួលរថយន្តគេជិះតាំងពីស្រុកកំណើត មកតាមរកប្ដីនៅកន្លែងកើតហេតុ ក៏ប្រទះឃើញប្ដីនៅជាមួយស្រីស្នេហ៍ ក្នុងបន្ទប់ជួលមែន ហើយក៏បានឈ្លោះគ្នាផ្អើលពេញភូមិ ខណៈនោះប្ដីក៏បានហៅបក្ខពួកមកគំរាមវាយមកលើរូបគាត់និងអ្នកភូមិទៀត។

​     ភ្លាមនោះរូបគាត់ជាប្រពន្ធបានទំនាក់ទំនងទៅបងប្អូនសារព័ត៌មានជាច្រើនស្ថាប័ននិងសមត្ថកិច្ចមូលដ្ឋានបានចុះមកដល់ ធ្វើឱ្យប្ដីនិងស្រីស្នេហ៍នាំគ្នាបើកទ្វារបន្ទប់រត់ប្រញាប់ប្រញាលចេញពីបន្ទប់ជួលផ្អើលពេញភូមិ។

​     ក្រោយមក​ រូបគាត់ក៏បានទៅដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលក្រាំងធ្នង់ ដើម្បីឲ្យសមត្ថកិច្ចជួយអន្តរាគមន៍​ និងសំណូមពរទៅថ្នាក់ដឹកនាំជួយរកយុត្តិធម៌ឱ្យគាត់ផង៕

IMG_5805 IMG_5804 IMG_5803

ដោយ​ ៖​ ភារ៉ា​ ដង្កោ