សារព័ត៌មាន នគរវត្ត តែងតែនាំមុខគេជានិច្ច
ខេត្តកោះកុង៖ យោងតាមរបាយការណ៍របស់អគ្គស្នងការដ្ឋាននគរបាលជាតិ នៅរសៀលថ្ងៃចន្ទទី០៩ ខែមករា ឆ្នាំ២០២៣នេះថា៖ កម្លាំងប៉ុស្តិ៍នគរបាលរដ្ឋបាលសង្កាត់ដងទង់ កាលពីថ្ងៃទី៦ ខែមករា ឆ្នាំ២០២៣កន្លងទៅនេះ បានទទួលពាក្យបណ្ដឹងឈ្មោះ ស៊ីន ហាហ្វីល ភេទប្រុស អាយុ៣៦ឆ្នាំ សញ្ជាតិខ្មែរអ៊ិស្លាម មានទីលំនៅ ភូមិ០៤ សង្កាត់ដងទង់ ថា មានជនមិនស្គាល់អត្តសញ្ញាណបានលួចរថយន្តមួយគ្រឿងម៉ាកCamry ពណ៌ស ពាក់ស្លាកលេខ ភ្នំពេញ២D-៤៦៦៧ ចតទុកនៅម្ដុំវិហារអ៊ិស្លាម ភូមិ៤ សង្កាត់ដងទង់ ។ ក្រោយពីទទួលបានពាក្យបណ្ដឹងលោកអធិការក្រុង បានដឹកនាំផ្នែកជំនាញធ្វើការស្រាវជ្រាវរកមុខសញ្ញានិងផ្ដល់ព័ត៌មានដល់សមត្ថកិច្ចជំនាញតាមបណ្ដាអធិការដ្ឋាននគរបាលក្រុង-ស្រុក និងខេត្តនានា។
លុះមកដល់ថ្ងៃទី៧ ខែមករា ឆ្នាំ២០២៣ ម៉ោង១៥និង៣០នាទីរសៀល កម្លាំងនៃអធិការដ្ឋាននគរបាលក្រុងព្រះសីហនុ បានធ្វើការឃាត់ខ្លួនមុខសញ្ញាសង្ស័យឈ្មោះសុះ គ្រីយ៉ា ភេទប្រុស អាយុ២៤ឆ្នាំ និងរថយន្តមួយគ្រឿងនៅចំណុចភូមិ៥ សង្កាត់លេខ៤ ក្រុងព្រះសីហនុ ខេត្តព្រះសីហនុ។
ចំណែកវត្ថុតាងដកហូត៖ រថយន្តមួយគ្រឿងម៉ាក Camry ពណ៌ស ពាក់ស្លាកលេខ ភ្នំពេញ២D-៤៦៦៧ ។
បច្ចុប្បន្នជនសង័្សយនៅព្រឹកថ្ងៃទី០៩ ខែមករា ឆ្នាំ២០២៣ កំពុងឃាត់ខ្លួនបណ្ដោះអាសន្ននៅអធិការដ្ឋាននគរបាលក្រុងខេមរភូមិន្ទ ដើម្បីបន្តនីតិវិធីច្បាប់៕
ដោយ៖សហការី
