🔴សាហាវព្រៃផ្សៃណាស់! ប្រើប្រាស់កាំបិតផ្គាក់កាប់មនុស្សទាំងកណ្ដាលថ្ងៃ(មានវីដេអូ)

ខេត្តពោធិ៍សាត់ ៖ មួយរយៈនេះគេសង្កេតឃើញក្មេងទំនើងឧស្សាហ៍ធ្វើសកម្មភាពកាប់ចាក់គ្នាជាញឹកញាប់នៅក្នុងក្រុងពោធិ៍សាត់។ ជាក់ស្ដែងកាលពីថ្ងៃទី១២ ខែមករា២០២៣គេឃើញយុវជនម្នាក់ស្លៀកពាក់ជាកូនសិស្សត្រូវយុវជនម្នាក់ផ្សេងទៀតបានប្រើប្រាស់កាំបិតផ្គាក់កាប់យកៗបណ្ដាលឲ្យរងរបួសដៃហូរឈាមកក្លាក់ ។

   ហេតុការណ៍ហិង្សា(កាប់)យ៉ាងសាហាវនេះ បានកើតឡើងនៅលើកំណាត់ផ្លូវកៅស៊ូលេខ១៥៥ ត្រង់ចំណុចក្បែរភ្លើងស្តុបផ្លូវបំបែកលាច ស្ថិតនៅក្នុងភូមិថ្នល់បំបែក សង្កាត់រលាប ក្រុង-ខេត្តពោធិ៍សាត់ ។

    យោងតាមប្រភពនានានៅកន្លែងកើតហេតុក៏ដូចជាអាជ្ញាធរមានសមត្ថកិច្ចមូលដ្ឋានបានលើកឡើងស្រដៀងៗគ្នាថា មុនកើតហេតុគេឃើញយុវជនរងគ្រោះមានសម្លៀកបំពាក់ជាសិស្សសាលាបានឈប់ម៉ូតូទិញស្លាបមាន់ក្រឡុក ខណៈនោះមានម៉ូតូ១គ្រឿងជិះឌុបគ្នា ហើយម្នាក់នៅខាងក្រោយបានហក់ពីលើម៉ូតូមកកាប់យកៗពុំដឹងមូលហេតុអ្វីនោះទេ រួចក៏ជិះម៉ូតូគេខ្លួនបាត់តែម្ដង បណ្ដាលឱ្យយុវជនរងគ្រោះដែលត្រូវបានគេកាប់នោះរងរបួសដៃស្ដាំ និងខូចខាតម៉ូតូផងដែរ ។

   អ្នកឃើញហេតុការណ៍បន្តថា កាប់កាំបិតទី១ ផ្លែកាំបិតប៉ាតដូចទះកំផ្លៀង បើពុំដូច្នោះទេអាចរងរបួសធ្ងន់ធ្ងរឬស្លាប់ក៏ថាបាន ភ្លាមនោះប្រជាពលរដ្ឋបានផ្ដល់ព័ត៌មានទៅសមត្ថកិច្ច ដើម្បីជួយធ្វើអន្ដរាគមន៍និងនាំជនរងរបួសទៅសួរនាំ ថែមទាំងទៅព្យាបាលមុខរបួស។ យុវជនរងរបួសឈ្មោះ ញ៉ិល ស៊ីនិត ភេទប្រុស អាយុ ១៦ឆ្នាំ ជនជាតិខ្មែរ មុខរបរសិស្ស មានទីលំនៅ ភូមិទួលក្រួស សង្កាត់ចំរើនផល ក្រុង-ខេត្តពោធិ៍សាត់ ។

   ប្រភពព័ត៌មានដដែលបញ្ជាក់បន្ថែមទៀតថា មុខសញ្ញាជាជនដៃដល់សមត្ថកិច្ចកំពុងមមាញឹកតាមស្វែងរក ខណៈដែលបានកំណត់យ៉ាងច្បាស់លាស់ រួមទាំងភិនភាគម៉ូតូជិះធ្វើសកម្មភាពផងនោះ ៕

IMG_7621

ដោយ៖  ប៉ឹម ពិន