🔴Update ៖ រថយន្តប៉ែនដឹកដីកិននគរបាលស្រីម្នាក់ស្លាប់ ជាអធិការរង នគរបាលខណ្ឌច្បារអំពៅ

ភ្នំពេញ ៖ បង្កការភ្ញាក់ផ្អើលទាំងព្រឹកព្រលឹមមានគ្រោះថ្នាក់ចរាចរណ៍រវាងរថយន្តប៉ែនបុកនិងកិនស្រ្តីមានតួរនាទីជាអធិការរងបណ្ដាលឱ្យស្លាប់ ។ ចំណែកបុរសបើករថយន្តបង្កព្យាយាមបើករត់គេចខ្លួនបាត់បន្សល់តែរថយន្ត ។

ហេតុការណ៍កើតឡើង កាលវេលាម៉ោង៧និង៣០នាទីព្រឹកថ្ងៃទី១៤ ខែ មករា ឆ្នាំ ២០២៣នៅតាមផ្លូវថៃហ្គ័រ ចំណុចផ្លូវបេតុងក្នុងបុរីហាយ ធិច ឌឹព្រីមៀម ស្ថិតនៅភូមិចំពុះក្អែក សង្កាត់ ព្រែកថ្មី ខណ្ឌច្បារអំពៅ ។

សមត្ថកិច្ចបានឱ្យដឹងថា, សពជនរងគ្រោះមានឈ្មោះ គង់ គន្ធា ភេទស្រី អាយុ ៤០ឆ្នាំ មុខរបរ នគរបាល តួរនាទី អធិការរងខណ្ឌច្បារអំពៅ ។

យោងតាមស្រ្តីជាម្ដាយបង្កើតប្រាប់អ្នកយកព័ត៌មានថា មុនកើតហេតុកូនស្រីគាត់បានជិះម៉ូតូម៉ាកZOOMER.Xពណ៌សលាយទឹកក្រូចពាក់ស្លាកលេខភ្នំពេញ១GL-៩៤៧៥ចេញពីផ្ទះគោលបំណងទៅអធិការដ្ឋានខណ្ឌច្បារអំពៅដើម្បីបំពេញភារកិច្ចស្រាប់តែមិនបាន១០នាទីផងលឺសូរមានប្រជាពលរដ្ឋរត់មកហៅគាត់ថាកូនស្រីជិះម៉ូតូត្រូវរថយន្តប៉ែនពណ៌សពាក់ស្លាកលេខភ្នំពេញ៣E-១០៣២កិនកូនស្រីគាត់បែកក្បាលស្លាប់នៅកន្លែងកើតហេតុភ្លាមៗរូបគាត់ជាម្ដាយមិនអាចទទួលយកបានដោយមួយប៉ព្រិចភ្នែកបាត់បង់ជីវិតកូនគាត់ ។ ស្រ្តីជាម្ដាយអំពាវនាវឱ្យសមត្ថកិច្ច ស៊ើបអង្កេត ស្រាវជ្រាវ តាមចាប់បុរសអ្នកបើកបរថយន្តបង្កហេតុយកមកចាត់ការតាមផ្លូវច្បាប់ផង ។

លោក ម៉ៅ សឿត អធិការខណ្ឌច្បារអំពៅ បានដឹកនាំមន្ត្រី ចុះពិនិត្យកន្លែងកើតហេតុ ដែលលោកស្រី គង់ គន្ធា អធិការរងខណ្ឌ ដែលរងគ្រោះថ្នាក់ចរាចរណ៍ ដោយរថយន្តប៉ែនដឹកដី បើកបុកពីក្រោយទាំងកំរោល បណ្តាលឱ្យស្លាប់បាត់បង់ជីវិត ។

លោក ម៉ៅ សឿត អធិការខណ្ឌច្បារអំពៅបន្តថា លោកស្រីវរសេនីយ៍ទោ គង់ គន្ធា អធិការរង​ នៃអធិការដ្ឋាននគរបាលខណ្ឌច្បារអំពៅ ដែលទទួលមរណភាព ដោយគ្រោះថ្នាក់ចរាចរណ៍ដ៏រន្ធត់ រថយន្តបែនដឹកដី​បុកជាមួយម៉ូតូ ZOOMER-X បណ្ដាលឲ្យដួលហេីយកិនគាត់ស្លាប់​យ៉ាងគួរឱ្យអាសូរ នៅផ្លូវបេតុង​ ក្នុងបុរីហាយ-ធិចឌឹព្រីមៀម ខណ្ឌច្បារអំពៅ​ នាម៉ោងជាង៧និង៣០នាទីព្រឹក​ ថ្ងៃសៅរ៍​ ទី១៤ ខែមករា​ ឆ្នាំ២០២៣នេះ សូមឲ្យវិញ្ញាណក្ខន្ធបង​បានទៅកាន់ទីស្ងប់​ ដោយក្ដីគោរព​ពីខ្ញុំបាទ ។ សពលោកស្រី អធិការរងខណ្ឌច្បារអំពៅ ត្រូវបានយកទៅតម្កល់នៅគេហដ្ឋាន ជិតកន្លែងកើតហេតុ ផ្ទះលេខ២៥ ផ្លូវគ្រីស្តាល់ ស្ថិតនៅភូមិចំពុះក្អែក សង្កាត់ ព្រែកថ្មី ខណ្ឌច្បារអំពៅ រាជធានីភ្នំពេញ ។

សូមបញ្ជាក់ថា, បច្ចុប្បន្ននេះការបើកបរ ភាគច្រើនឡានធំៗ បើកលឿននិងស៊ីផ្លេខ្លាំងៗ ហាក់ដូចជាពុំបានគោរពច្បាប់ចរាចរណ៍ បណ្ដាលឲ្យគ្រោះថ្នាក់ចរាចរណ៍ជារៀងរាល់ថ្ងៃ ក្លាយទៅជាឃាតកតាមដងផ្លូវ។ សូមបងប្អូនជនរួមជាតិទាំងអស់គ្នា ចូលរួមគោរពច្បាប់ចរាចរណ៍ ដើម្បីការពារជីវិតខ្លួនយើង និងជីវិតអ្នកដទៃ ៕

ដោយ ៖ សហការី