រុស្ស៊ីបញ្ជាក់ថា មិនខ្វល់ពីរថក្រោះណាតូ ដោយបញ្ជូននាវាចម្បាំង ១៧គ្រឿង ចូលកៀកអ៊ុយក្រែន

រុស្ស៊ីទទូចថា រថក្រោះអូតង់នឹងមិនផ្លាស់ប្តូរលទ្ធផលនៅជួរមុខឡើយ។ អ៊ុយក្រែនបានរាយការណ៍ថា នាវាចម្បាំងរុស្ស៊ីចំនួន ១៧ គ្រឿងកំពុងបំពេញកាតព្វកិច្ចក្បែរទឹកដីខ្លួន។
យោងតាម TASS នៅថ្ងៃទី ១៦ ខែមករា បានដកស្រង់សំដី អ្នកនាំពាក្យវិមានក្រឹមឡាំង លោក Dmitry Peskov បាននិយាយថា ការសន្យារបស់ប៉ូឡូញ និងអង់គ្លេសក្នុងការផ្តល់រថក្រោះដល់ក្រុងគៀវ បង្ហាញយ៉ាងច្បាស់ថាពួកគេចង់ឱ្យជម្លោះកាន់តែកើនឡើងថែមទៀត។ ទោះជាយ៉ាងណាក៏ដោយរថក្រោះទាំងនេះនឹងមិនផ្លាស់ប្តូរលទ្ធផលនៅលើជួរខាងមុខនោះទេ។
លោក Peskov បាននិយាយថា “រថក្រោះទាំងនោះនឹងឆេះ ដូចសព្វាវុធដែលពួកគេធ្លាប់បានបញ្ជូនមក” ។

សេចក្តីថ្លែងការណ៍របស់លោក Peskov ធ្វើឡើងនៅពេលដែលលោកខាងលិចកំពុងបង្កើនការប្តេជ្ញាចិត្តរបស់ខ្លួនក្នុងការបញ្ជូនអាវុធធុនធ្ងន់ទៅកាន់អ៊ុយក្រែន។ រដ្ឋាភិបាលអង់គ្លេសបានប្តេជ្ញាផ្តល់រថក្រោះប្រយុទ្ធសំខាន់ 14 Challenger 2 ខណៈដែលសហរដ្ឋអាមេរិក បារាំង និងអាល្លឺម៉ង់បានប្តេជ្ញាផ្តល់រថក្រោះប្រយុទ្ធថ្មើរជើងបន្ថែមទៀត។ ខាងប៉ូឡូញបានបង្ហាញពីចេតនារបស់ខ្លួនក្នុងការបញ្ជូនរថក្រោះ Leopard ទៅកាន់អ៊ុយក្រែន ទោះបីជាមានការព្រមានពីអាល្លឺម៉ង់ក៏ដោយ។
កងទ័ពជើងទឹកអ៊ុយក្រែនបាននិយាយថា ខ្លួនបានរកឃើញនាវាចម្បាំងរុស្ស៊ី ១៧ គ្រឿងនៅលើកាតព្វកិច្ចប្រយុទ្ធនៅសមុទ្រខ្មៅ។ ក្នុងនោះមាននាវាចម្បាំង៦គ្រឿងបំពាក់ដោយកាំជ្រួចនាវា Kalibr។ លើសពីនេះទៀត នាវាចម្បាំងរុស្ស៊ីពីរគ្រឿងក៏ត្រូវបានគេឃើញនៅក្នុងសមុទ្រ Azov ខណៈដែលនាវាចម្បាំងចំនួន ៩ គ្រឿងផ្សេងទៀតត្រូវបានដាក់ពង្រាយនៅជិតសមុទ្រមេឌីទែរ៉ាណេ។
អ្នកតំណាងនៃកងទ័ពជើងទឹកអ៊ុយក្រែនបានបង្ហើបថា រុស្ស៊ីបានដាក់ពង្រាយជាលើកដំបូងនូវនាវាចម្បាំងដែលផ្ទុកកាំជ្រួចបើកបរ Kalibr ទៅកាន់សមុទ្រខ្មៅកាលពីថ្ងៃទី ១៤ ខែមករា ស្របពេលជាមួយការវាយឆ្មក់កាំជ្រួចទ្រង់ទ្រាយធំរបស់ទីក្រុងម៉ូស្គូមកលើអ៊ុយក្រែន ៕

ដោយ៖ ធីរីណា(រូបថត៖ Tass)