គ្រោះថ្នាក់ចរាចរណ៍ទៀតហើយនៅចំណុចផ្លូវវាងក្រុងប្រសព្វនឹងផ្លូវជាតិលេខ ៥៣បណ្ដាលឱ្យសិស្សស្រីម្នាក់ស្លាប់

ខេត្តកំពង់ឆ្នាំង ៖ កុមារីម្នាក់ស្លាប់នៅក្នុងហេតុការណ៍គ្រោះថ្នាក់ចរាចរណ៍មួយបានកើតឡើងនៅវេលាម៉ោង ១និង២០នាទីរសៀល ថ្ងៃទី ១៨ ខែមករាឆ្នាំ ២០២៣ នៅចំណុចផ្លូវប្រសព្វរវាងផ្លូវជាតិលេខ៥៣ និងផ្លូវវាងក្រុង ស្ថិតនៅក្នុងភូមិគល់គុប ឃុំស្រែថ្មី ស្រុករលាប្អៀរ ខណៈដែលក្មេងស្រីរងគ្រោះជិះកង់ទៅសាលារៀន។

ប្រភពពីសមត្ថកិច្ចនគរបាលស្រុករលាបៀរឲ្យដឹងថាកុមារីរងគ្រោះមានឈ្មោះ វ៉ាត ធាណាន់ អាយុ ១៤ ឆ្នាំមានទីលំនៅភូមិគល់គុប ឃុំស្រែថ្មីស្រុករលាបៀរ ។

ប្រភពដដែលបានឲ្យដឹងថា មុនពេលកើតហេតុកុមារីរងគ្រោះបានជិះកង់ទៅសាលារៀនតាមបណ្ដោយផ្លូវ ជាតិលេខ ៥៣ពីលិចទៅកើត។ លុះមកដល់ចំណុចកើតហេតុដែលជាផ្លូវខ្វែងទិសរវាងផ្លូវវាងក្រុងនិងផ្លូវជាតិលេខ ៥៣ក៏ស្រាប់តែមានរថយន្តម៉ាកហាយឡេនឌ័រ ១គ្រឿងពណ៌ស្ករ ពាក់ស្លាកលេខ ពោធិ៍សាត់ 2B.7606 បើកបរដោយជនពុំស្គាល់ឈ្មោះ ក្នុងដំណើរពីត្បូង ទៅជើងក្នុងល្បឿនលឿន បណ្ដាលឲ្យបុកក្មេងស្រីរងគ្រោះ ស្លាប់នៅកន្លែង ។

ក្រោយពេលកើតហេតុសមត្ថកិច្ចបានទៅដល់ធ្វើការវាស់វែងនិងបានប្រគល់សពកុមារីរងគ្រោះទៅក្រុមគ្រួសារធ្វើបុណ្យតាមប្រពៃណី ចំណែក អ្នកបើកបរ រថយន្តបានរត់គេចខ្លួនបាត់ដោយទុករថយន្តចោល។

គួររំលឹកដែរថា នេះជាករណី គ្រោះថ្នាក់ចរាចរណ៍ថ្មីទៀតហើយ លើផ្លូវវាងក្រុង ប្រសព្វជាមួយផ្លូវជាតិលេខ ៥៣ ដែលគិតមកដល់ពេលនេះមានចំនួន៨ករណីហើយ ចាប់តាំងពីបើកឱ្យដំណើរការពីថ្ងៃទី ២ដល់ថ្ងៃទី ១៨ ខែមករានេះ៕

ដោយ៖ សូរិយា