សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ឆ្នាំង ៖ នៅព្រឹកថ្ងៃទី២០ ខែ មករា ឆ្នាំ២០២៣ មានគ្រោះថ្នាក់ចរាចរណ៍មួយបង្កឡើងដោយគោយន្តម៉ាស៊ីនកិនស្រូវដែលបើកពីលិចទៅកើត បោះពួយយ៉ាងលឿនបណ្ដាលឱ្យរេចង្កូតទៅបុកលោកយាយអាយុ៧០ឆ្នាំបណ្ដាលឱ្យបាត់បង់អាយុជីវិតនៅនឹងកន្លែងកើតហេតុភ្លាមៗ ដោយសារអ្នកបើកបរមានការធ្វេសប្រហែស ។
សូមបញ្ជាក់ថា ហេតុការណ៍នេះបានកើតឡើងនៅវេលាម៉ោង ៨:២០នាទីព្រឹកថ្ងៃទី២០ខែមករា២០២៣ នៅចំណុចភូមិបឹងស្ទេងកើត ឃុំខ្លុងពពក ស្រុកទឹកផុស ខេត្តកំពង់ឆ្នាំង ។
យោងតាមសម្ដីពលរដ្ឋបានឱ្យដឹងថា គោយន្តកែច្នៃកិនស្រូវមួយគ្រឿងនេះបើកបរពីលិចទៅកើតក្នុងស្ថានភាពល្បឿនលឿន បណ្ដាលឱ្យធ្លាក់ជង្ហុកហើយរេចង្កូតមកបុកលោកយាយដែលឈរនៅចិញ្ចើមផ្លូវពេញទំហឹងបណ្ដាលឱ្យបាត់បង់អាយុជីវិតមួយរំពេចនៅនឹងកន្លែងកើតហេតុតែម្ដង។ អ្នកបង្កហេតុរស់នៅ ភូមិខ្នារ ឃុំអភិវឌ្ឍន៍ ស្រុកសាមគ្គីមានជ័យ ។
បច្ចុប្បន្ននេះគោយន្តកែច្នៃនិងអ្នកបង្កហេតុត្រូវបានសមត្ថកិច្ចជំនាញនាំខ្លួនទៅអធិការដ្ឋានស្រុក ដើម្បីដោះស្រាយតាមនីតិវិធីច្បាប់ ។ ដោយឡែកសពជនរងគ្រោះត្រូវបានសាច់ញាតិយកទៅធ្វើបុណ្យតាមប្រពៃណី ៕
ដោយ ៖ សហការី
