សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់ស្រវឹងស្រាឡេីងជោកជាំបានបើករថយន្តម៉ាកGM ទៅបុកបង្គោលភ្លើងបំភ្លឺផ្លូវរលេីងគល់ធ្វើឱ្យខូចខាតអស់១ដើម រីឯរថយន្តខូចខាតផ្នែកខាងមុខយ៉ាងដំណំ តែសំណាងល្អដែរដែលមិនបង្កឱ្យមនុស្សរងរបួស។ ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង១១ និង៣០នាទីយប់ ថ្ងៃព្រហស្បតិ៍ទី២ ខែកុម្ភៈ ឆ្នាំ២០២៣ ស្ថិតនៅតាមបណ្ដោយផ្លូវ៦០ម៉ែត្រ (មហាវិថីសម្ដេចតេជោ) ចម្ងាយពីភ្លើងស្តុបមែរសឺដេស១០០ម៉ែត្រ ក្នុងសង្កាត់ចាក់អង្រែក្រោម ខណ្ឌមានជ័យ ។
តាមប្រភពព័ត៌មានពីកន្លែងកើតហេតុបានឱ្យដឹងថា មុនពេលកើតហេតុ គេឃើញរថយន្តស៊េរីទំនើបម៉ាកGM ពណ៌ស ពាក់ផ្លាកលេខភ្នំពេញ2BQ -8577 ធ្វើដំណើរតាមបណ្ដោយផ្លូវ៦០ម៉ែត្រក្នុងទិសដៅពីជើងទៅត្បូង ដោយល្បឿនយ៉ាងលឿន ខណៈមកដល់ចំណុចកើតហេតុខាងលើក៏រេចង្កូតមកខាងស្ដាំដៃជ្រុលទៅបុកបង្គោលភ្លើងបំភ្លឺផ្លូវរលេីងគល់ខូចខាត១ដើម រីឯរថយន្តបង្កវិលមួយជុំខូចផ្នែកខាងមុខយ៉ាងដំណំ ។
ក្នុងករណីគ្រោះថ្នាក់ចរាចរណ៍នេះ មិនបណ្ដាលឱ្យមនុស្សណាម្នាក់រងរបួសនោះទេ ដោយគេសង្កេតឃេីញថា មានបុរសម្នាក់ជាតៃកុងរថយន្តបានបេីកទ្វារចេញមកក្រៅទាំងសភាពស្រវឹងស្រាជោកជាំតែម្ដង ។
ក្រោយមក សមត្ថកិច្ចមូលដ្ឋានបានចុះមកដល់ និងបានទាក់ទងទៅសមត្ថកិច្ចជំនាញចរាចរណ៍ នៃស្នងការដ្ឋាននគរបាលរាជធានីភ្នំពេញដេីម្បីចុះមកធ្វេីការវាស់វែងយករថយន្តបង្កទៅរក្សាទុករង់ចាំដោះស្រាយតាមច្បាប់ ៕
ដោយ ៖ ភារ៉ា ដង្កោ
