សារព័ត៌មាន នគរវត្ត តែងតែនាំមុខគេជានិច្ច
ខេត្តតាកែវ ៖ យោងតាមផេកផ្លូវការរបស់ស្នងការនគរបាលខេត្តតាកែវបានឲ្យដឹងនៅថ្ងៃទី១៤ ខែកុម្ភៈ ឆ្នាំ២០២៣នេះថា នៅថ្ងៃ អង្គារ ៩រោច ខែ មាឃ ឆ្នាំខាល ចត្វាស័ក ព.ស ២៥៦៦ ត្រូវនឹងថ្ងៃទី ១៤ ខែកុម្ភៈ ឆ្នាំ២០២៣ វេលាម៉ោង ២ និង ០០ នាទី រំលងអធ្រាត្រ កម្លាំងជំនាញ នៃអធិការដ្ឋាននគរបាលស្រុកបាទី សហការជាមួយកម្លាំងប៉ុស្ដិ៍នគរបាលរដ្ឋបាលចំបក់ និងប្រជាការពារបានឃាត់ខ្លួនជនសង្ស័យចំនួន២ នាក់ ជិះម៉ូតូមួយគ្រឿង ស៊ុយសូគីនិច ពណ៌ខ្មៅ ពាក់ស្លាកលេខ ភ្នំពេញ 1AJ-6901 ចំណុចស្ពានអន្លុងធន់ ស្ថិតក្នុងភូមិតានប់ ឃុំចំបក់ ស្រុកបាទី ខេត្តតាកែវ ដែលមានលាក់ កាំបិតបុ័ងតោចំនួន ០១ ដេីម ប្រវែង ៣០ សង់ទីម៉ែត្រ,ដាវសាំម៉ូរ៉ៃ កែច្នៃ ចំនួន ០១ ដេីម ប្រវែង ៥៨ សង់ទីម៉ែត្រ នៅនឹងខ្លួនខណៈជនសង្ស័យកំពុងជិះម៉ូតូតាមផ្លូវ។
ជនសង្ស័យទាំង ០២នាក់ ខាងលើមាន ៖ ១.ឈ្មោះ អុន ភ័ក្រ្តា ភេទប្រុស អាយុ ១៦ រស់នៅភូមិស្តុកប្រិយ៍ ឃុំត្រពាំងសាប ស្រុកបាទី ខេត្តតាកែ ២.ឈ្មោះ ឡី លីហួរ ភេទប្រុស អាយុ ១៨ឆ្នាំរស់នៅភូមិរលាំងគ្រេីល ឃុំត្រពាំងសាប ស្រុកបាទី ខេត្តតាកែវ ។
ដោយមានការចង្អុលបង្ហាញ ពី លោក ឧត្តមសេនីយ៍ទោ ស្នងការ នៃស្នងការដ្ឋាននគរបាលខេត្តតាកែវ និង សម្របសម្រួលនីតិវិធី ពី លោក ព្រះរាជអាជ្ញា អមសាលាដំបូងខេត្តតាកែវ កម្លាំងសមត្ថកិច្ចក៏បានធ្វេីការឃាត់ខ្លួន ។
បច្ចុប្បន្នជនសង្ស័យនិងវត្ថុតាង កម្លាំងជំនាញកំពុងធ្វើការសាកសួរ និងកសាងសំណុំរឿងបញ្ជូនទៅសាលាដំបូងខេត្តចាត់ការតាមនីតិវិធី ៕
ដោយ៖សុខាសែនជ័យ
