សារព័ត៌មាន នគរវត្ត តែងតែនាំមុខគេជានិច្ច
លោក Todd Boehly មិនមានចេតនាបណ្តេញគ្រូបង្វឹកលោក Graham Potter ចេញទេ បើទោះបីជា Chelsea ចាញ់ក្រុម Southampton យ៉ាងអាម៉ាស់ក្នុងលទ្ធផល ១–០ កាលពីរសៀលថ្ងៃសៅរ៍ក៏ដោយ។
ក្រុមតោខៀវត្រូវបានក្រុម Southampton យកឈ្នះនៅកីឡដ្ឋាន Stamford Bridge ដោយសារការទាត់បាល់ហ្រ្វីឃីកដ៏អស្ចារ្យរបស់ James Ward-Prowse។ លទ្ធផលនេះបានធ្វើឱ្យក្រុមរបស់លោក Potter ឈរនៅលេខរៀងទី១០ក្នុងក្របខ័ណ្ឌ Premier League ដោយតាមពីក្រោយក្រុម Newcastle ចំនួន១០ពិន្ទុ ខណៈដែលក្រុម Southampton នៅតែឈរបាតតារាងដដែល។
អ្នកគាំទ្រ Chelsea បានធ្វើឱ្យអារម្មណ៍របស់ពួកគេដឹងអំពីការកាន់តំណែងរបស់លោក Potter ដោយការស្រែកហ៊ោបន្ទាប់ពីការបរាជ័យចុងក្រោយរបស់ពួកគេ។ ថៅកែក្លិបតោខៀវដែលត្រូវបានតែងតាំងកាលពី៦ខែមុនយល់ពីមូលហេតុដែលអ្នកគាំទ្រមិនសប្បាយចិត្ត ហើយបានសន្យាថានឹងខិតខំប្រឹងប្រែងដើម្បីរៀបចំអ្វីៗឱ្យត្រឹមត្រូវ។
ប្រធានក្លិប Chelsea លោក Boehly និងក្រុមប្រឹក្សាភិបាលដែលនៅមិនបានផ្លាស់ប្តូរចិត្តលើលោក Potter បន្ទាប់ពីការចាញ់ Southampton។ ពួកគេនឹងគាំទ្រគ្រូបង្វឹកសញ្ជាតិអង់គ្លេសរូបនេះដែលនៅសល់កុងត្រារយៈពេល៤ឆ្នាំកន្លះក្នុងរយៈពេលដ៏លំបាកនេះ។
សម្ព័ន្ធរបស់ម្ចាស់ក្លិប Boehly បានបញ្ចប់ការកាន់កាប់ Chelsea កាលពីរដូវក្តៅមុន ហើយបានបណ្តេញអ្នកចាត់ការជោគជ័យលោក Thomas Tuchel ចេញកាលពីខែកញ្ញាឆ្នាំមុន។ គ្រូបង្វឹកសញ្ជាតិអាឡឺម៉ង់រូបនេះបានដឹកនាំក្រុមឈ្នះពានរង្វាន់ចំនួន៣ ក្នុងអំឡុងពេល២០ខែរបស់គាត់ក្នុងការគ្រប់គ្រងរួមទាំង Champions League និងឈានដល់វគ្គផ្តាច់ព្រ័ត្រចំនួន៣ផ្សេងទៀត។
យ៉ាងណាក៏ដោយវាមិនគ្រប់គ្រាន់សម្រាប់ម្ចាស់ក្លិប Boehly ដើម្បីរក្សាលោក Tuchel ឱ្យគ្រប់គ្រងនោះទេ។ លោក Potter បានឈានជើងចូលទៅក្នុងកៅអីដ៏ក្តៅគគុកបន្ទាប់ពីបានដឹកនាំក្រុម Brighton ក្នុងកំពូលទាំង១០នៃ Premier League និងទទួលបានការកោតសរសើរតាមរយៈការងាររបស់គាត់ជាមួយក្រុមស៊ុយអែត Ostersund និង Swansea ក្នុងក្របខ័ណ្ឌ Championship ។
ពេលវេលារបស់លោក Potter នៅក្លិប Ostersund គឺគួរឱ្យចាប់អារម្មណ៍ជាពិសេស ខណៈដែលគាត់បានសម្រេចបានជ័យជម្នះចំនួន៣ និងបានឈ្នះពាន Swedish Cup។
ការដឹកនាំរបស់លោក Potter នៅ Stamford Bridge បានចាប់ផ្តើមយ៉ាងល្អ ដោយបានឈ្នះការប្រកួត Premier League ៣លើកជាប់ៗគ្នា ប៉ុន្តែការរីកចម្រើនរបស់ Chelsea ត្រូវបានបញ្ឈប់ដោយការបរាជ័យក្នុងលីកចំនួន៣ជាប់ៗគ្នាមុនការប្រកួត World Cup នៅកាតា។ ក្រុមនេះបានឈ្នះតែ២ប្រកួតនៅ Premier League ចាប់តាំងពីពេលនោះមក។
Chelsea បានរងបរាជ័យ ១–០ ក្រោមស្នាដៃក្រុម Borussia Dortmund ក្នុងក្របខ័ណ្ឌ Champions League កាលពីយប់ថ្ងៃពុធសប្តាហ៍មុន ហើយការចាញ់កាលពីថ្ងៃសៅរ៍បានធ្វើឱ្យមានការសង្ស័យបន្ថែមទៀតលើអនាគតរបស់អ្នកចាត់ការទូទៅលោក Potter។
Chelsea ត្រូវចាប់ផ្តើមទទួលជ័យជម្នះឆាប់ជាជាងពេលក្រោយប្រសិនបើលោក Potter ត្រូវដឹកនាំស្តារមុខមាត់ការងាររបស់គាត់ឡើងវិញ។ ក្រុមនេះប្រឈមមុខនឹងការប្រកួតក្រៅទឹកដីដ៏លំបាកទៅកាន់ក្រុម Tottenhamក្នុងការប្រកួតក្របខ័ណ្ឌ Premier League បន្ទាប់នៅថ្ងៃទី២៦ កុម្ភៈ និងធ្វើជាម្ចាស់ផ្ទះទទួលក្រុម Borussia Dortmund ក្នុងជើងទី២នៅ Champions League នៅថ្ងៃទី៨ ខែមីនាខាងមុខ ៕
ដោយ៖ ភារៈ(រូបភាព ៖ mirror.com)
