រដ្ឋអាជ្ញាបារាំងបានបើកការស៊ើបអង្កេតបឋមលើការចោទប្រកាន់ពីបទរំលោភសេពសន្ថវៈដោយខ្សែការពារម៉ារ៉ុក Achraf Hakimi ដែលជាប្រភពជិតស្និទ្ធនឹងការស៊ើបអង្កេតបានបញ្ជាក់ក្នុងរដ្ឋអាជ្ញាបារាំង។
ស្ត្រីវ័យ២៤ឆ្នាំម្នាក់បានចោទខ្សែការពារ Achraf Hakimi ដែលកំពុងលេងឲ្យក្លិបយក្សបារាំង Paris St-Germain ថា បានចាប់រំលោភនាងនៅផ្ទះរបស់គាត់ក្នុងរដ្ឋធានីបារាំងកាលពីថ្ងៃទី២៥ ខែកុម្ភៈកន្លងទៅ ប៉ុន្តែកីឡាករ Achraf Hakimi បានបដិសេធការចោទប្រកាន់នេះ។
ប្រភពបានឲ្យដឹងថា ស្ត្រីរូបនេះបានរាយការណ៍ពីហេតុការណ៍នេះនៅប៉ុស្តិ៍ប៉ូលិសកាលពីថ្ងៃអាទិត្យ ប៉ុន្តែមិនបានចោទប្រកាន់ទេ។ ការិយាល័យរដ្ឋអាជ្ញាសាធារណៈដែលគ្រប់គ្រងករណីនេះនៅទីក្រុង Nanterre នៅជាយក្រុងភាគខាងលិចនៃទីក្រុងប៉ារីសបានបដិសេធមិនធ្វើអត្ថាធិប្បាយទេ ប៉ុន្តែបានបញ្ជាក់ថា ការស៊ើបអង្កេតបានចាប់ផ្តើមហើយ។
ក្លិប PSG បានប្រកាសនៅក្នុងសេចក្តីថ្លែងការណ៍មួយថា “ក្លិបគាំទ្រកីឡាករដែលបានបដិសេធយ៉ាងម៉ឺងម៉ាត់នូវការចោទប្រកាន់ និងជឿជាក់លើប្រព័ន្ធយុត្តិធម៌។
Paris St-Germain គឺជាស្ថាប័នដែលលើកកម្ពស់ការគោរពទាំងនៅលើ និងក្រៅទីលាន”។
កើតនៅប្រទេសអេស្ប៉ាញ ប៉ុន្តែ Hakimi មានសញ្ជាតិជាម៉ារ៉ុក ហើយជាកីឡាករសំខាន់មួយរូប ខណៈដែលម៉ារ៉ុកបានបង្កើតប្រវត្តិសាស្ត្រដោយការឈានទៅវគ្គពាក់កណ្តាលផ្តាច់ព្រ័ត្រនៃព្រឹត្តិការណ៍ World Cup នៅកាតា កាលពីឆ្នាំ២០២២ ដែលជាក្រុមអាហ្វ្រិកដំបូងគេដែលធ្វើបានដូច្នេះ។
ទម្រង់លេងរបស់កីឡាកររូបនេះបានធ្វើឱ្យគាត់ទទួលបានកិត្តិយសនៅឯពិធីប្រគល់ពានរង្វាន់បាល់ទាត់ល្អបំផុតរបស់ FIFA ដែលធ្វើឡើងនៅទីក្រុងប៉ារីសកាលពីល្ងាចថ្ងៃចន្ទជាកន្លែងដែលគាត់ត្រូវបានគេដាក់ឈ្មោះនៅក្នុងក្រុមបាល់ទាត់ពិភពលោកប្រចាំឆ្នាំរបស់ FIFPro។ កីឡាករវ័យ២៤ឆ្នាំរូបនេះបានឈរនៅលើឆាកដើម្បីប្រមូលពានរង្វាន់ជាមួយនឹងអ្នកឈ្នះផ្សេងទៀតរួមទាំងមិត្តរួមក្រុម PSG របស់គាត់គឺ KylianMbappe និង Lionel Messi ៕
ដោយ៖ ភារៈ(រូបភាព ៖ BBC Sport)