សារព័ត៌មាន នគរវត្ត តែងតែនាំមុខគេជានិច្ច
ខេត្តព្រះសីហនុ៖ បុរសម្នាក់ បានបើកបរម៉ូតូមិនពាក់មួកសុវត្ថិភាព និងគ្មានផ្លាកលេខ ខឹងប៉ូលិសចាប់ផាកពិន័យទុកម៉ូតូចោល រួចបង្ហោះហ្វេសប៊ុកចោទប្រកាន់លើមន្រ្តីចរាចរណ៍ ចុងក្រោយសំពះសុំទោសជាសាធារណៈ និងធ្វើកិច្ចសន្យាអប់រំ។
ជាក់ស្ដែងយោងតាមប្រភពព័ត៌មានពីស្នងការដ្ឋាននគរបាលខេត្តព្រះសីហនុ នៅយប់ថ្ងៃអាទិត្យទី១៩ ខែមីនា ឆ្នាំ២០២៣នេះ បានឱ្យដឹងថា កាលពីវេលាម៉ោង ១២ថ្ងៃត្រង់ថ្ងៃនេះ មានករណីម្ចាស់ម៉ូតូដែលទុកម៉ូតូចោល (ក្នុងករណី បើកបរមិនពាក់មួកសុវត្ថិភាព និងម៉ូតូគ្មានផ្លាកលេខ) និងទុកម៉ូតូចោលនៅកន្លែងអនុវត្តច្បាប់ រួចបានបង្ហោះលើបណ្តាញសង្គមចោទប្រកាន់លើមន្រ្តីចរាចរណ៍ផ្លូវគោក អនុវត្តនៅគោលដៅស្តុបសុខា កាលពីល្ងាចថ្ងៃទី១៨ ខែមីនា ឆ្នាំ២០២៣ ។
ប្រភពដដែលបន្តថា កាលពីព្រឹកមិញនេះ មុនដំបូងគាត់ឱ្យឪពុកចាស់ជរា និងក្មួយប្រុសចូលមកដោះស្រាយយកម៉ូតូជំនួស ក្រោយពីជំនាញបានប្រាប់ឱ្យម្ចាស់ម៉ូតូចូលខ្លួនព្រោះគាត់ជាអ្នកល្មើសបទបញ្ញាតិចរាចរណ៍ នៅវេលាម៉ោង១២ថ្ងៃត្រង់នេះ ទើបម្ចាស់ម៉ូតូដែលល្មើសបទបញ្ញាតិចរាចរណ៍ បានចូលខ្លួនមកកាន់ការិយាល័យចរាចរណ៍ផ្លូវគោក និងបានទទួលនូវកំហុសរបស់ខ្លួន ព្រមទាំងបានលុបចោលpageវាយប្រហារចោទប្រកាន់មកលេីមន្រ្តីចរាចរណ៍ចេញពីបណ្តាញសង្គមដោយខ្លួនឯង ដោយគ្មានការបង្ខិតបង្ខំ និងដោយស្ម័គ្រចិត្ត ។
គួរជម្រាបថា ដោយមើលឃើញពីទឹកចិត្តរបស់ឪពុកចាស់ជរា កម្លាំងជំនាញចរាចរណ៍ផ្លូវគោកមិនបានធ្វើការពិន័យទេ ត្រឹមធ្វើកិច្ចសន្យាអប់រំ និងប្រគល់ម៉ូតូជូនទៅវិញ៕
ដោយ៖សហការី
