សារព័ត៌មាន នគរវត្ត តែងតែនាំមុខគេជានិច្ច
លោក Herve Renard បានលាលែងពីតំណែងជាគ្រូបង្វឹកក្រុមបុរសរបស់អារ៉ាប៊ីសាអ៊ូឌីត ហើយគ្រោងនឹងដឹកនាំក្រុមជម្រើសជាតិនារីបារាំងក្នុងការប្រកួតបាល់ទាត់ពិភពលោកនារីនៅរដូវក្តៅនេះ។
សហព័ន្ធកីឡាបាល់ទាត់អារ៉ាប៊ីសាអ៊ូឌីត (SAFF) បានប្រកាសកាលពីថ្ងៃពុធថា លោក Renard វ័យ៥៤ឆ្នាំបានស្នើសុំឱ្យបញ្ចប់កិច្ចសន្យារបស់គាត់។គាត់នឹងជំនួសលោកស្រី Corinne Diacre ដែលត្រូវបានបណ្តេញចេញបន្ទាប់ពីកីឡាការិនីសំខាន់ៗជាច្រើនបាននិយាយថា ពួកគេនឹងលែងតំណាងឱ្យប្រទេសរបស់ពួកគេក្រោមការដឹកនាំរបស់គាត់ទៀតហើយ។
ប្រធាន SAFF លោក Yasser Al-Misehal បានប្រាប់ Saudi Sports Channel ថា “Renard មានការផ្តល់ជូនពីសហព័ន្ធបារាំង និងបង្ហាញពីបំណងរបស់គាត់ក្នុងការចាប់យកឱកាសនេះ។ យើងត្រូវបានគេជូនដំណឹង៤ថ្ងៃមុនពេលទីផ្សារដោះដូរអន្តរជាតិបច្ចុប្បន្ន ហើយខ្ញុំបានទទួលលិខិតពីសហព័ន្ធបារាំង បានពិគ្រោះជាមួយក្រុមប្រឹក្សាភិបាល ហើយយើងបានសម្រេចចិត្តទទួលយកសំណើនេះ” ។
បុរសសញ្ជាតិបារាំង Herve Renard បានចូលដឹកនាំក្រុមបុរសអារ៉ាប៊ីសាអ៊ូឌីតក្នុងខែកក្កដា ឆ្នាំ២០១៩ ហើយបានដឹកនាំពួកគេទៅកាន់វគ្គចែកពូល World Cup ជាលើកទី២របស់ពួកគេ ដែលជាកន្លែងដែលពួកគេបានធ្វើឱ្យម្ចាស់ជើងឯកអាហ្សង់ទីនភ្ញាក់ផ្អើលជាមួយនឹងជ័យជម្នះ ២–១ នៅប្រទេសកាតាកាលពីឆ្នាំមុន។
បន្ទាប់ពីប្រកួតមិត្តភាពជាមួយបូលីវីកាលពីថ្ងៃអង្គារ លោក Renard ដែលមិនធ្លាប់គ្រប់គ្រងក្រុមនារី បានប្រាប់អ្នកយកព័ត៌មានថា “ខ្ញុំសូមថ្លែងអំណរគុណដល់មនុស្សគ្រប់គ្នានៅក្នុងប្រទេសអារ៉ាប៊ីសាអ៊ូឌីតសម្រាប់ការគាំទ្ររបស់ពួកគេក្នុងរយៈពេលជិត៤ឆ្នាំ។ ខ្ញុំគិតថាខ្ញុំធ្វើបានអតិបរមាជាមួយក្រុម ខ្ញុំមិនអាចឈានដល់កម្រិតមួយផ្សេងទៀត ដូច្នេះខ្ញុំចូលចិត្តស្មោះត្រង់ជាមួយអ្នករាល់គ្នា។ អរគុណម្តងទៀត វាជាពេលវេលាដ៏អស្ចារ្យ”។
លោក Renard បានឈ្នះពានរង្វាន់ Africa Cup of Nations ក្នុងនាមជាគ្រូបង្វឹកជាមួយទាំង Zambia និង Ivory Coast ដែលជាមនុស្សដំបូងគេដែលដឹកនាំប្រទេសផ្សេងៗគ្នាឱ្យឈ្នះពានរង្វាន់ AFCON ។
ប្រទេសបារាំងដែលជាប់ចំណាត់ថ្នាក់លេខ៥នៅលើពិភពលោកកំពុងស្វែងរកការឈ្នះការប្រកួត World Cup ជាលើកដំបូងរបស់ពួកគេនៅរដូវក្តៅនេះ ហើយសហព័ន្ធបាល់ទាត់បារាំងនឹងសង្ឃឹមថាកីឡាការិនីដែលបានធ្វើពហិការមិនលេងឱ្យក្រុមជម្រើសជាតិនារីក្រោមការដឹកនាំរបស់លោកស្រី Diacre នឹងត្រលប់មកវិញ។
កីឡាការិនី Wendie Renard, Kadidiatou Diani និង Marie-Antoinette Katoto បានរិះគន់ប្រព័ន្ធរបស់បារាំងនៅពេលពួកគេលាឈប់ពីកាតព្វកិច្ចអន្តរជាតិ។ អតីតប្រធានក្រុម Wendie Renard បាននិយាយថា នាងកំពុងបោះជំហានថយក្រោយពីក្រុមដើម្បីការពារសុខភាពផ្លូវចិត្តរបស់នាង ហើយ Diani បានអះអាងថា ការគ្រប់គ្រងរបស់ក្រុមគឺជាហេតុផលនៅពីក្រោយការសម្រេចចិត្តរបស់នាង។
គួរបញ្ជាក់ថា ការប្រកួតបាល់ទាត់នារីពិភពលោក (Women’s World Cup 2023) នឹងប្រព្រឹត្តទៅចាប់ពីថ្ងៃទី២០ ខែកក្កដា ដល់ថ្ងៃទី២០ ខែសីហាឆ្នាំ២០២៣ខាងមុខនេះ ៕
ដោយ៖ ភារៈ(រូបភាព ៖ BBC Sport)
