សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្ដាល៖ អ្នកថ្មើរជើងម្នាក់បានរងរបួសធ្ងន់ ខណៈកំពុងដើរឆ្លងផ្លូវត្រូវបានម៉ូតូមួយគ្រឿងបើកបុកពេញមួយទំហឹង នៅថ្ងៃទី២០ ខែមេសា ឆ្នាំ២០២៣ វេលាម៉ោង១៩និង១០នាទី លើផ្លូវជាតិលេខ២ត្រង់ចន្លោះគីឡូម៉ែត្រលេខ២១-២២ ក្នុងភូមិស្រុកធំ ឃុំជើងកើប ស្រុកកណ្ដាលស្ទឹង ខេត្តកណ្ដាល។
មន្ត្រីនគរបាលចរាចរណ៍ស្រុកកណ្ដាលស្ទឹងបានឱ្យដឹងថា ជនរងគ្រោះរបួសធ្ងន់ឈ្មោះ ដូយ នោ ភេទប្រុស អាយុ៥១ឆ្នាំមានទីលំនៅបច្ចុប្បន្នភូមិត្រពាំងយោង ឃុំពារាម ស្រុកបាទី ខេត្តតាកែវ ។
ចំណែកភាគីខាងម៉ូតូឈ្មោះ ជា វណ្ណី ភេទប្រុស អាយុ២៤ឆ្នាំ មានទីលំនៅបច្ចុប្បន្នភូមិអូរដំរី ឃុំត្បូងដំរី ស្រុកបាទី ខេត្តតាកែវ បើកបរម៉ូតូម៉ាកហុងដាឌ្រីមសេ១២៥ ពណ៌ខ្មៅ ពាក់ស្លាកលេខ តាកែវ- ១X-២០៨៩។
ប្រភពដដែលបន្តថា នៅវេលាម៉ោងកើតហេតុខាងលើគេបានឃើញម៉ូតូម៉ាកហុងដាឌ្រីម បើកបរក្នុងទិសដៅពីត្បូងទៅជើង(តាកែវ-ភ្នំពេញ) លុះមកដល់ចំណុចកើតហេតុខាងលើបានបុកជនរងគ្រោះជាអ្នកថ្មើរជើង ខណៈដែលគាត់កំពុងដើរឆ្លងផ្លូវពីលិចទៅកើតបណ្ដាលឱ្យរងរបួសធ្ងន់។
ចំពោះវត្ថុតាងម៉ូតូកម្លាំងផ្នែកសណ្ដាប់ធ្នាប់ចរាចរណ៍បានយកមករក្សាទុកនៅអធិការដ្ឋានបណ្ដោះអាសន្ន។ចំណែកអ្នកបើកបរម៉ូតូ(ឃាត់ខ្លួន)។ តាមការសន្និដ្ឋាន ករណីនេះបង្កឡើងដោយអ្នកថ្មើរជើងឆ្លងផ្លូវមិនមើលឆ្វេងស្ដាំអោយបានច្បាស់លាស់ ។ចំណែកអ្នកបើកបរម៉ូតូបើកបរស្ថិតក្រោមជាតិស្រវឹងក្នុងកម្រិតជាតិអាល់កុល ០,៨០៤mg/l៕
ដោយ៖ ស្អាងជ័យ
