សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បន្ទាប់ពីបេក្ខជន បេក្ខនារី បានបងា្ហញទេពកោសល្យ និងបញ្ចេញសមត្ថភាពយ៉ាងស្វាហាប់ក្នុងកម្មវិធីប្រកួតប្រជែងដ៏អស្ចារ្យ សមាជិក ប.ស.ស. ឆ្នើម ២០២៣ គណៈកម្មការបានវាយតម្លៃជ្រើសរើសបេក្ខជន បេក្ខនារី ដែលឆ្នើមចំនួន ១០រូប ដែលនឹងក្លាយជាម្ចាស់ជ័យលាភីលេខ១ លេខ២ លេខ៣ និងជ័យលាភីប្រជាប្រិយភាពដែលទទួលបានពីការពេញចិត្តនៅលើផេកហ្វេសបុកផ្លូវការ ប.ស.ស. ព្រមទាំងជ័យលាភីថតរូបស្អាត។ នេះបើយោងតាមការបញ្ជាក់ពី ក្រសួងការងារ និងបណ្ដុះបណ្ដាលវិជ្ជាជីវៈ នៅថ្ងៃទី២ ខែឧសភា ឆ្នាំ២០២៣ ។
ពិធីប្រគល់ពានរង្វាន់ជូនម្ចាស់ជ័យលាភីនាឱកាសនេះ លោកបណ្ឌិត អ៊ិត សំហេង រដ្ឋមន្រ្ដីក្រសួងការងារ និងបណ្ដុះបណ្ដាលវិជ្ជាជីវៈ បានផ្ដល់កិត្តិយសដ៏ខ្ពង់ខ្ពស់ប្រគល់ពានរង្វាន់ជូនដល់ម្ចាស់ជ័យលាភីលេខ១ ដែលក្នុងនោះជ័យលាភីលេខ១ ទទួលបានថវិកាចំនួន ៦លានរៀល និងលោកជំទាវ កែវ ណារី អគ្គនាយិកាក្រុមហ៊ុន ណារីស្វីតវីឡាហូថែល និងExplorer B Y S L ក៏បានឧបត្ថម្ភបន្ថែម ៤លានរៀលដល់ម្ចាស់ជ័យលាភីលេខ១ ផងដែរ ចំណែកម្ចាស់ជ័យលាភីលេខ២ ទទួលបានថវិកាចំនួន ៥លានរៀល ម្ចាស់ជ័យលាភីលេខ៣ ទទួលបានថវិកាចំនួន ៤លានរៀល ម្ចាស់ជ័យលាភីប្រជាប្រិយភាព ទទួលបានថវិកាចំនួន ២លាន ៥សែនរៀល និងម្ចាស់ជ័យលាភីថតរូបស្អាត ទទួលបានថវិកាចំនួន ២លាន ៥សែនរៀល ដោយឡែកចំពោះប្អូនៗដែលពុំជាប់ជ័យលាភី ក៏ទទួលបានថវិកាក្នុងមា្នក់ចំនួន ៦សែនរៀល ផងដែរ។ ជាមួយគ្នានេះ លោកបណ្ឌិតរដ្ឋមន្រ្តី ក៏បានផ្ដល់កិត្តិយសប្រគល់ជូននូវលិខិតថ្លែងអំណរគុណជូនចំពោះដៃគូសហការរៀបចំ និងធនាគារដៃគូដែលបានឧបត្ថម្ភក្នុងកម្មវិធីសមាជិក ប.ស.ស. ឆ្នើម២០២៣ នេះផងដែរ។
សូមបញ្ជាក់ជូនថា៖ បេក្ខជន-បេក្ខនារីដែលជាម្ចាស់ជ័យលាភី សមាជិក ប.ស.ស. ឆ្នើម ឆ្នាំ២០២៣នេះ រួមមាន៖
* សម្រាប់បេក្ខជន៖
– ជ័យលាភីលេខ១ បានទៅលើបេក្ខជន ឃុត ចាន់ថេង ពាក់ស្លាកលេខ៣ មកពីខេត្តកំពង់ស្ពឺ
– ជ័យលាភីលេខ២ បានទៅលើបេក្ខជន ចក សុជាតិ ពាក់ស្លាកលេខ៤ មកពីខេត្តសៀមរាប
– ជ័យលាភីលេខ៣ បានទៅលើបេក្ខជន ភ័ណ្ឌ ផល្លា ពាក់ស្លាកលេខ៩ មកពីខេត្តកំពង់ចាម
– ជ័យលាភីប្រជាប្រិយភាព បានទៅលើបេក្ខជន ភុំ សុធា ពាក់ស្លាកលេខ២ មកពីខេត្តបន្ទាយមានជ័យ
– ជ័យលាភីថតរូបស្អាត បានទៅលើបេក្ខជន ម៉េង ពន្លឺ ពាក់ស្លាកលេខ១៤ មកពីខេត្តតាកែវ
* សម្រាប់បេក្ខនារី៖
– ជ័យលាភីលេខ១ បានទៅលើបេក្ខនារី ឆោម វាសនា ពាក់ស្លាកលេខ១៨ មកពីខេត្តព្រះសីហនុ
– ជ័យលាភីលេខ២ បានទៅលើបេក្ខនារី អ៊ួន ផារី ពាក់ស្លាកលេខ៨ មកពីខេត្តស្វាយរៀង
– ជ័យលាភីលេខ៣ បានទៅលើបេក្ខនារី ប៊ុន ស្រីណុច ពាក់ស្លាកលេខ១ មកពីខេត្តកំពង់ឆ្នាំង
– ជ័យលាភីប្រជាប្រិយភាព បានទៅលើបេក្ខនារី ម៉ៅ ផល ពាក់ស្លាកលេខ៧ មកពីខេត្តតាកែវ
– ជ័យលាភីថតរូបស្អាត បានទៅលើបេក្ខនារី ហូ អេនី ពាក់ស្លាកលេខ១៥ មកពីខេត្តព្រះសីហនុ ៕
ដោយ : សហការី
