សារព័ត៌មាន នគរវត្ត តែងតែនាំមុខគេជានិច្ច
អ្នកចាត់ការទូទៅលោក Simone Inzaghi បាននិយាយថា ក្រុម Inter Milan ត្រូវតែគិតលើជំនឿចិត្តរបស់ខ្លួន និងអាចសម្របខ្លួនបានជាមួយនឹងគូប្រជែង AC Milan ដោយក្រុមរបស់គាត់ដើម្បីបំបែកកំណត់ត្រាចាញ់ក្នុងក្របខ័ណ្ឌ Champions League ទល់នឹងសត្រូវដែលធ្លាប់ស្គាល់គ្នានៅលីកជាមួយគ្នា។
គូប្រជែងរបស់អ៊ីតាលី Inter Milan និង AC Milan ដែលបានឈ្នះជើងឯក Champions League ចំនួន ១០រួមបញ្ចូលគ្នាបានប្រឈមមុខគ្នា២លើកក្នុងវគ្គជម្រុះដោយ AC Milan ទទួលបានជ័យជម្នះក្នុងការប្រកួតទាំង២កាលពីឆ្នាំ២០០៣ និង២០០៥។
ទោះបីជាយ៉ាងណាក៏ដោយ Inter Milan បានទទួលជោគជ័យកាន់តែច្រើននៅក្នុងការប្រកួតនាពេលថ្មីៗនេះ ដោយឈ្នះ៣ និងស្មើ២ក្នុងចំណោមការប្រកួតទាំង៧ដែលក្រុមបានលេងចាប់តាំងពីលោកInzaghi ចូលកាន់តំណែងជាអ្នកចាត់ការកាលពីឆ្នាំ២០២១។
ជ័យជម្នះទាំងនោះរួមបញ្ចូលការទទួលជ័យជម្នះ ៣–០ ក្នុងការប្រកួតវគ្គផ្តាច់ព្រ័ត្រ Italian Super Cup កាលពីដើមឆ្នាំនេះ និងវគ្គពាក់កណ្តាលផ្តាច់ព្រ័ត្រ Coppa Italia កាលពីឆ្នាំមុន។
លោក Inzaghi បានប្រាប់អ្នកយកព័ត៌មានមុនការប្រកួតជើងទី១វគ្គពាក់កណ្តាលផ្តាច់ព្រ័ត្ររបស់ក្រុមទាំង២នៅ San Siro រាត្រីនេះថា “យើងបានលេងជាច្រើនដង ខ្ញុំបាននិយាយវាពីមុន។ យើងនឹងត្រូវតែពូកែនៅពេលដែលយើងត្រូវការឈ្នះ ពីព្រោះវាតែងតែមានព្រឹត្តិការណ៍ដែលមិននឹកស្មានដល់ក្នុងការប្រកួតសំខាន់ៗបែបនេះ ដែលចុងក្រោយ យើងតែងតែធ្វើបានល្អដោយមានភាពល្អឥតខ្ចោះ”។
លោកបន្តថា “វាជាការប្រកួតដ៏សំខាន់ដូចការប្រកួតវគ្គផ្តាច់ព្រ័តដទៃទៀត។ វាមិនមែនជាការប្រកួត Derby ទេ ប៉ុន្តែជាការប្រកួតប្រជែងយកពានរង្វាន់។ យើងដឹងថា វាមានន័យយ៉ាងណាសម្រាប់យើង សម្រាប់ក្លិប សម្រាប់អ្នកគាំទ្រ សូម្បីតែសម្រាប់ខ្លួនខ្ញុំផ្ទាល់ ហើយខ្ញុំពិតជាមានទំនុកចិត្តលើកីឡាករដែលកំពុងផ្ដោតអារម្មណ៍ និងចង់ឈ្នះខ្លាំងណាស់”។
ក្តីសង្ឃឹមរបស់ Inter Milan ក្នុងការទទួលបានជ័យជម្នះលើកដំបូងលើ AC Milan ក្នុងការប្រកួតកំពូលរបស់អឺរ៉ុបត្រូវបានផ្តល់ការជំរុញដោយរបួសដល់ខ្សែប្រយុទ្ធ Rafael Leao ដែលត្រូវបានប្តូរចេញនៅនាទីទី១១នៃជ័យជម្នះ ២–០ លើក្រុម Lazio ក្នុងក្របខ័ណ្ឌ Serie A កាលពីថ្ងៃសៅរ៍។
លោក Inzaghi អះអាងថា “អវត្តមានរបស់កីឡាករអន្តរជាតិព័រទុយហ្គាល់រូបនេះនឹងមានឥទ្ធិពលតិចតួចលើការរៀបចំរបស់ Inter ដោយយើងទាំងអស់គ្នាដឹងពីគុណភាពរបស់កីឡាករ។ យើងដឹងថាគាត់អាចឬប្រហែលជាមិននៅទីនោះ ច្បាស់ណាស់ថាយើងនឹងធ្វើការកែតម្រូវខ្លះ ប៉ុន្តែវានឹងមិនប៉ះពាល់ដល់ផែនការហ្គេមរបស់យើងទេ”។
គួរបញ្ជាក់ថា ការជួបគ្នាចុងក្រោយរបស់ Inter Milan ជាមួយ AC Milan ក្នុងវគ្គពាក់កណ្តាលផ្តាច់ព្រ័ត្រ Champions League បានកើតឡើងកាលពី២០ឆ្នាំមុនក្នុងរដូវកាល២០០២–២០០៣ នៅពេលដែល AC Milan បានយកឈ្នះឈានទៅលើកពានរង្វាន់អឺរ៉ុបជាលើកទី៦ ៕
ដោយ៖ ភារៈ(រូបភាព ៖ Reuters/CNA)
