សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ជនសង្ស័យ២នាក់ជាមុខសញ្ញាជួញដូរគ្រឿងញៀន ត្រូវបានកម្លាំងអធិការដ្ឋាននគរបាលខណ្ឌសែនសុខ បង្ក្រាប និងឃាត់ខ្លួនរួមជាមួយថ្នាំញៀនចំនួន០៦កញ្ចប់ថង់តូច និងឧបកណ៍ប្រើប្រាស់មួយចំនួន ។
ករណីបង្ក្រាបនេះ បានធ្វើឡើងកាលពីវេលាម៉ោង១០និង៣០នាទីព្រឹក ថ្ងៃទី២៨ ខែសីហា ឆ្នាំ២០១៦ នៅចំណុចបន្ទប់ជួលលេខ១៦ក ជាន់ទី១ ផ្លូវលំ ភូមិទឹកថ្លា សង្កាត់ទឹកថ្លា ខណ្ឌសែនសុខ រាជធានីភ្នំពេញ ។
ប្រតិបត្តិការចុះបង្ក្រាបនេះ ដឹកនាំដោយលោកវរៈសេនីយ៍ឯក ម៉ក់ ហុង អធិការខណ្ឌ
សែនសុខ លោកវរៈសេនីយ៍ត្រី គួក សុខហួរ អធិការរងនគរបាលខណ្ឌ រួមជាមួយកម្លាំងនគរបាលប៉ុស្តិ៍ទឹកថ្លាជាច្រើនរូបទៀត ។
ជនសង្ស័ទាំង២នាក់ ដែលឃាត់ទី១ មានឈ្មោះ តែម ប៉ូរ៉ា ភេទប្រុស អាយុ២២ឆ្នាំ មុខរបរជាងដែកស្នាក់នៅបន្ទប់ជួលលេខ១៦ក ជាន់ទី១ផ្លូវលំភូមិទឹកថ្លា សង្កាត់ទឹកថ្លា ខណ្ឌសែនសុខ និងមានស្រុកកំណើតភូមិអង្កាញ់ ឃុំប្រធាតុ ស្រុកកំពង់ត្របែកខេត្តព្រៃវែង និងទី២ មានឈ្មោះ យ៉ាំ សុភា ភេទប្រុស
អាយុ៣៨ឆ្នាំ មុខរបរមិនពិតប្រាកដ ស្នាក់នៅបន្ទប់ជួលលេខ១៦ក ជាន់ទី១ ផ្លូវលំភូមិទឹកថ្លា សង្កាត់ទឹកថ្លា ខណ្ឌសែនសុខ និងមានស្រុកកំណើតភូមិកក់ ឃុំកក់ ស្រុកពញាក្រែក ខេត្តកំពង់ចាម ។
លោកវរៈសេនីយ៍ឯក ម៉ក់ ហុង អធិការនគរបាលខណ្ឌ បានប្រាប់អោយដឹងថាមុនឈានទៅបង្ក្រាបមុខសញ្ញាខាងលើ គឺសមត្ថកិច្ចបានប្រើប្រាស់វិធានការណ៍ជំនាញចុះស៊ើបអង្កេត និងស្រាវជ្រាវ ទើបឈានដល់ការឃាត់ខ្លួនបានជនសង្ស័យទាំង២នាក់ ដល់បន្ទប់ជួលជាក់ស្តែងតែម្តង ហើយជាលទ្ធផលដកហូតបានថ្នាំញៀនប្រភេទក្រាមសថ្លាចំនួន៦កូនថង់តូច និងថ្នាំគ្រាប់ពណ៌ផ្កាឈូកចំនួន៥ចំណិតតូច ឧបករណ៍ប្រើប្រាស់គ្រឿងញៀនមួយចំនួន និង ដាវសាំម៉ូរ៉ៃ ១ដើម ។
បច្ចុប្បន្នជនសង្ស័យទាំង២នាក់ខាងលើ កំពុងឃាត់ខ្លួន និងសាកសួរនៅអធិការដ្ឋាននគរបាលខណ្ឌសែនសុខ ដើម្បីកសាងសំណុំរឿងបញ្ជូនទៅតុលាការចាត់ការបន្តតាមនីតិវិធី ៕ តុង សីហា
