កម្មករសំណង់ម្នាក់ឡើងជែងរថយន្តស្របទិសមិនផុតទាក់ដៃចង្កូតត្រូវកិនស្លាប់

ខេត្តបន្ទាយមានជ័យ៖ កម្មករសំណង់ម្នាក់បានស្លាប់ភ្លាមៗនៅនឹងកន្លែង ដោយករណីគ្រោះថ្នាក់ចរាចរណ៍នៅវេលាម៉ោង០៦និង៤២នាទីព្រឹកថ្ងៃទី២០ខែកក្កដា ឆ្នាំ២០២៣  លើផ្លូវជាតិលេខ៥ត្រង់ចំណុចមុខវត្តនិមិត្តសុធីរាម(វត្តកូនដំរី)ស្ថិតក្នុងភូមិកូនដំរី សង្កាត់និមិត្ត ក្រុងប៉ោយប៉ែត  ។

នគរបាលចរាចរណ៍ក្រុងប៉ោយប៉ែត បានឲ្យដឹងថា៖ជនរងគ្រោះដែលស្លាប់ឈ្មោះ សោម ស៊ីណែល ភេទប្រុស អាយុ៣៩ឆ្នាំ មុខរបរ កម្មករ រស់នៅភូមិគុត្តសត ឃុំគុត្តសត ស្រុកអូរជ្រៅ  បើកបរម៉ូតូម៉ាកហុងដាទ្រីមសេ១២៥ ពណ៌ខ្មៅ ពាក់ផ្លាកលេខ ភ្នំពេញ 1BE-5036 ។

នគរបាលបានបញ្ជាក់ថា៖ មុនពេលកើតហេតុជនរងគ្រោះបានបើកម៉ូតូក្នុងទិសដៅពីកើតទៅលិចស្របគ្នាជាមួយរថយន្តស៊ឺមីរ៉ឺម៉កហ៊ីណូ ពណ៌ស ក្បាលរថយន្តពាក់ផ្លាកលេខ ភ្នំពេញ 3F-3588 រ៉ឺម៉កពាក់ផ្លាកលេខ ភ្នំពេញ 4A-7612 ពេលដល់ចំណុចកើតហេតុបានឡើងវ៉ាជែងពុំផុតក៏បានទាក់ដៃចង្កូតម៉ូតូនិងផ្នែកខាងស្តាំរថយន្តបណ្តាលអោយបោកជាមួយរថយន្តគ្រោះថ្នាក់ស្លាប់តែម្តង។

ចំណែកអ្នកបើកបររថយន្ត(ក្តាប់ឈ្មោះពុំបាន)ក្រោយកើតហេតុបានទុករថយន្តចោលចុះរត់គេចខ្លួនបាត់  ។

ចំពោះម៉ូតូខូចខាតស្រាល រីឯរថយន្តពុំមានខូចខាតនោះឡើយ ។រថយន្តនិងម៉ូតូត្រូវកំលាំងសមត្ថកិច្ចជំនាញយកមករក្សាទុកនៅអធិការដ្ឋានក្រុងរង់ចាំដោះស្រាយតាមផ្លូវច្បាប់។សពរងគ្រោះក្រោយពីធ្វើការវាស់វែងសមត្ថកិច្ចប្រគល់ជូនសាច់ញាតិយកទៅធ្វើបុណ្យតាមប្រពៃណី ៕

ដោយ ៖ វណ្ណា