សារព័ត៌មាន នគរវត្ត តែងតែនាំមុខគេជានិច្ច
ខេត្តប៉ៃលិន៖ ប្រភពព័ត៌មានពីសមត្តកិច្ចនគរបាលជំនាញក្រុងបានឱ្យដឹងថា នៅថ្ងៃទី១៩ ខែកក្កដា ឆ្នាំ២០២៣ វេលាម៉ោង ១៩និង០៥នាទីយប់ មានករណីគ្រោះថ្នាក់ចរាចរណ៍រវាងម៉ូតូនឹងម៉ូតូបុកគ្នានៅលើផ្លូវក្រួសក្រហម ត្រង់ចំណុចមុខផ្ទះលោក ច្រឹង វិសាល ស្ថិតក្នុងភូមិទួលខៀវ សង្កាត់ប៉ៃលិន ក្រុងប៉ៃលិន ខេត្តប៉ៃលិន បណ្តាលឱ្យមនុស្សរងរបួសធ្ងន់០១នាក់(ស្រី), រងរបួសមធ្យម០១នាក់(ប្រុស), ខូចខាតម៉ូតូកម្រិតធ្ងន់០១គ្រឿង,ខូចខាតម៉ូតូកម្រិតស្រាល០១គ្រឿង ដូចខាងក្រោម៖
១-ភាគី(ក)ឈ្មោះ ទឹត ចាន់ធា ភេទប្រុស អាយុ៣០ឆ្នាំ មុខរបរកសិករ រស់នៅភូមិបរតាំងស៊ូ សង្កាត់បយ៉ាខា ក្រុងប៉ៃលិន ខេត្តប៉ៃលិន(របួសមធ្យម) បើកបរម៉ូតូម៉ាកYAMAHA ពណ៌ខ្មៅ ពាក់ផ្លាកលេខ ភ្នំពេញ១BV-៣០៨០ ក្នុងទិសដៅពីកើតទៅលិចដោយប្រើល្បឿនលឿន ហើយបានបុកគ្នានៅចំណុចកណ្តាលផ្លូវក្រួសក្រហម។
២-ភាគី(ខ) ឈ្មោះ សៀង រតនី ភេទស្រី អាយុ២៤ឆ្នាំ មុខរបរលក់ដូរ រស់នៅភូមិក្បាលព្រលាន សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន(របួសធ្ងន់បាក់ដៃខាងឆ្វេង) បើកបរម៉ូតូម៉ាកToday ពណ៌ត្រួយចេក គ្មានផ្លាកលេខក្នុងទិសដៅពីលិចទៅកើត ដោយបើកបរបញ្រ្ចាសទិសគ្នាមកប៉ះគ្នានៅចំណុចកណ្តាលផ្លូវក្រួសក្រហម។
សមត្តកិច្ចជំនាញបានបន្តថា ករណីនេះបណ្ដាលមកពីកត្តាមនុស្សបើកបរខ្វះការប្រុងប្រយ័ត្ន មិនប្រកាន់ស្តាំរៀងខ្លួន និងកន្លែងកើតហេតុជាផ្លូវក្រួសក្រហម ហើយភាគីណាជាអ្នកបង្កគឺរង់ចាំការវាស់វែងលម្អិតនៅពេលព្រឹកបន្ថែមទៀត។
-បច្ចុប្បន្ន ភាគី(ក)និងភាគី(ខ)ត្រូវបានបញ្ជូនទៅសង្រ្គោះនៅមន្ទីរពេទ្យបង្អែកខេត្តប៉ៃលិន។
ករណីខាងលើនេះ កម្លាំងជំនាញផែនសណ្តាប់ធ្នាប់សាធារណៈ នៃអធិការដ្ឋាននគរបាលក្រុងប៉ៃលិនបានយកវត្ថុតាងទាំងសងខាងមករក្សាទុក រង់ចាំការដោះស្រាយតាមនីតិវិធីច្បាប់៕
ដោយ៖ ស សារ៉េត
