សារព័ត៌មាន នគរវត្ត តែងតែនាំមុខគេជានិច្ច
ខេត្តកំពត៖ លោកឧត្តមសេនីយ៍ទោ ម៉ៅ ច័ន្ទមធុរិទ្ធ ស្នងការនគរបាលខេត្តកំពត នៅល្ងាចថ្ងៃសៅរ៍ទី២៦ ខែសីហា ឆ្នាំ២០២៣នេះ បានឱ្យដឹងថា នារីជនជាតិអ៉ីតាលីម្នាក់ បានធ្វើអត្តឃាតចងកសម្លាប់ខ្លួន ដោយសារតែគាត់មានសភាពស្រវឹងស្រាជោកជាំ។
លោកឧត្តមសេនីយ៍ទោ ម៉ៅ ច័ន្ទមធុរិទ្ធ បានគូសបញ្ជាក់ថា យោងតាមរយៈវីដេអូកាមេរ៉ាសុវត្ថិភាពនៅក្បែរកន្លែងកើតហេតុ កាលពីវេលាម៉ោងប្រហែលជិត៣ ទៀបភ្លឺថ្ងៃទី២៦ ខែសីហា បានឃើញស្ត្រីរូបនេះ ដើរសំដៅទៅបង្គោលដងទង់ជាតិ រួចឈរលើខឿន ហើយទាញខ្សែទាក់កលោតទម្លាក់ខ្លួនចុះតែម្តង។
គួរជម្រាបជូនថា មុនពេលកើតហេតុកាលពីព្រលឹមថ្ងៃទី២៦ ខែសីហា ឆ្នាំ២០២៣នេះ អ្នកដំណើរបានប្រទះឃើញសពស្ត្រីបរទេសម្នាក់នេះ បានព្យួរ.កជាប់នឹងខ្សែចងទង់ជាតិនៅឆ្នេរព្រែកកំពង់បាយ ភូមិ១ឧសភា សង្កាត់កំពង់កណ្តាល ក្រុងកំពត បង្កឱ្យមានភាពភ្ញាក់ផ្អើលឡើង ខណៈប្រជាពលរដ្ឋមួយចំនួនសង្ស័យថាជាអំពើឃាតកម្មផងដែរ។
ដោយឡែកមន្ត្រីនគរបាលការិយាល័យវិទ្យាសាស្ត្របច្ចេកទេស នៃស្នងការដ្ឋានខេត្តកំពត បានឱ្យដឹងថា សពនារីរងគ្រោះឈ្មោះ តូណែលី ជីយូលៀ ( TONELLI GIULIA) អាយុ ២៧ឆ្នាំ ជាជនជាតិអ៉ីតាលី កាន់លិខិតឆ្លងដែនលេខ8486712។
មន្រ្តីដដែលបន្តថា កាលពីវេលាម៉ោង៦ និង១៥នាទីព្រឹកថ្ងៃទី២៦ ខែសីហានេះ កម្លាំងសមត្ថកិច្ចមូលដ្ឋាន បានទទួលសេចក្តីរាយការណ៍ពីអ្នកដំណើរអំពីការប្រទះឃើញសពស្រ្តីបរទេសព្យួរកនៅឆ្នេរព្រែកកំពង់បាយ។ ក្រោយទទួលដំណឹងនេះភ្លាម មន្ត្រីជំនាញបានចុះដល់គោលដៅ រួចដឹកសពទៅកាន់មន្ទីរពេទ្យបង្អែកខេត្តដើម្បីដំណើរការកោសល្យវិច័យ។
គួរបញ្ជាក់ថា យោងតាមចម្លើយបំភ្លឺរបស់មិត្តភក្តិជនរងគ្រោះ ជាស្រ្តីនិងជាជនជាតិបរទេសដូចគ្នា បានរៀបរាប់ប្រាប់សមត្ថកិច្ចថា៖ មុនពេលកើតហេតុ ជនរងគ្រោះបានចូលរួមផឹកស៊ីក្នុងហាងជនបរទេសមួយក្បែរកន្លែងកើតហេតុ តាំងពីក្បាលព្រលប់រហូតដល់ម៉ោង១២កណ្តាលអធ្រាត្រទើបបែកគ្នា។ លុះព្រឹកឡើងស្រាប់តែមានគេប្រាប់ថា ជនរងគ្រោះបានស្លាប់ដោយចង.កធ្វើអត្តឃាតខ្លួនឯង ទើបធ្វើឱ្យនាងតក់ស្លុតយ៉ាងខ្លាំង។
ក្រោយកេីតហេតុ មន្ត្រីកោសល្យវិច័យ បានបញ្ជាក់ថា នៅលើដងខ្លួនសាកសពពុំមានស្លាកស្នាមអ្វីគួរឱ្យកត់សម្គាល់នោះទេ ពោលគឺការស្លាប់នេះជនរងគ្រោះពិតជាបានធ្វើអត្តឃាតខ្លួនឯងពិតប្រាកដមែន៕
ដោយ៖ សហការី
