សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ យុវជន ២នាក់រៀនមិនសូវពូកែរៀនសូត្រ ពូកែតែខាងបង្ហោះម៉ូតូ តាមផ្លូវសាធារណៈ ដែលអាចបង្កការគ្រោះថ្នាក់ដែលអ្នកដ៏ទៃទីបំផុតត្រូវកម្លាំងនគរបាលខណ្ឌទួលគោក ចាប់ឃាត់ខ្លួនយកមកអធិការដ្ឋាននគរបាលខណ្ឌ ដោះកង់ម៉ូតូចេញរួចឱ្យចាប់ម៉ូតូលើកដើរជុំវិញដងទង់ជាតិទើបដឹងខ្លួនខុស។ នេះបេីយោងតាមប្រភពព័ត៌មានពីមន្រ្តីនគរបាលខណ្ឌទួលគោក បានឱ្យដឹងនៅព្រឹកថ្ងៃចន្ទទី០៤ ខែកញ្ញា ឆ្នាំ២០២៣។
មន្ត្រីជំនាញខណ្ឌទួលគោក បានឱ្យដឹងទៀតថា កម្លាំងផ្នែកជំនាញ នៃអធិការដ្ឋាននគរបាលខណ្ឌទួលគោក កាលពីថ្ងៃទី០២ ខែកញ្ញា ឆ្នាំ២០២៣ វេលាម៉ោងប្រហែល២១ និង៣៥នាទី បានធ្វើការឃាត់ខ្លួនមនុស្ស០២នាក់ករណីបង្ហោះម៉ូតូនៅតាមបណ្តោយផ្លូវសារធារណៈ ដែលបង្ហោះម៉ូតូតាមបណ្តោយផ្លូវលេខ២៦១កែងនឹងផ្លូវលេខ២៣០ រហូតដល់ចំណុចផ្លូវលេខ២៦១កែងនឹងផ្លូវលេខ៣៣៦ សង្កាត់បឹងសាឡាង ខណ្ឌទួលគោក រាជធានីភ្នំពេញ រួចសមត្ថកិច្ចក៏បានឃាត់ខ្លួនមនុស្ស០២នាក់ខាងលើ បញ្ជូនមកកាន់អធិការដ្ឋាននគរបាលខណ្ឌទួលគោក ដើម្បីសាកសួរតាមនីតិវិធី។
ក្រោយពីបានសាកសួរចម្លើយចប់សព្វគ្រប់ ដោយបានបញ្ជាពីលោកវរសេនីយ៏ឯក ប៊ុន សត្យា ស្នងការរងទទួលផែនការងារនគរបាលព្រហ្មទណ្ឌ នៃស្នងការដ្ឋាននគរបាលរាជធានីភ្នំពេញ នៅថ្ងៃទី០៣ កញ្ញាម្សិលមិញ បានអនុញ្ញាតឱ្យជនទាំងពីរនាក់នេះវិលត្រឡប់ទៅលំនៅដ្ឋានវិញ ដោយមានអាណាព្យាបាលមកធានាយកទៅនិងចុះកិច្ចសន្យាអប់រំកុំឱ្យមានលើកក្រោយទៀត ។
ជនទាំង០២នាក់មាន៖ ១-ឈ្មោះ ប៉ែន សុគា ហៅ ហួរ ភេទប្រុស អាយុ១៥ឆ្នាំ ជនជាតិខ្មែរ មុខរបរ នៅផ្ទះ ស្នាក់នៅផ្ទះមិនចាំលេខ ផ្លូវBT៧៧ សង្កាត់បឹងទំពុន ខណ្ឌមានជ័យ ។
២-ឈ្មោះ ហន ទិត្យច័ន្ទដារ៉ា ហៅ រ៉ា ភេទប្រុស អាយុ១៥ឆ្នាំ ជនជាតិខ្មែរ មុខរបរនៅផ្ទះ ស្នាក់នៅផ្ទះលេខ៣៦៦ ផ្លូវលេខ៦២ សង្កាត់ស្ទឹងមានជ័យទី១ ខណ្ឌមានជ័យ ។
សម្ភារៈចាប់យកមាន៖ ម៉ូតូមាក់ Suzuki Nex ពណ៌ ស ខៀវ ពាក់ស្លាកលេខ បាត់ដំបង 1AI.8003 ។
បច្ចុប្បន្នជនទាំងពីរនាក់ខាងលើ បានវិលត្រឡប់ទៅលំនៅដ្ឋានវិញហើយ ក្រោយធ្វើកិច្ចសន្យា ណែនាំអប់រំឱ្យបញ្ឈប់សកម្មភាពបង្ហោះម៉ូតូទៀត៕
ដោយ៖ សហការី
