ក្រោយមានការវាយប្រហារនៅតំបន់សមុទ្រអារ៉ាប់ ឥណ្ឌាបញ្ជូននាវាចម្បាំង៣គ្រឿងទៅការពារ

ចែករំលែក៖

សារព័ត៌មាន Reuters នាថ្ងៃអង្គារ ទី២៦ ខែធ្នូ ឆ្នាំ២០២៣ បានផ្សាយថា កងទ័ពជើងទឹកឥណ្ឌា បានប្រកាសថា ខ្លួននឹងដាក់ពង្រាយនាវាចម្បាំងបំពាក់មីស៉ីលប៉ុន្មានគ្រឿងទៅកាន់តំបន់សមុទ្រអារ៉ាប់ បន្ទាប់ពីកប៉ាល់ពាណិជ្ជកម្មមួយគ្រឿង ដែលមានទំនាក់ទំនងជាមួយអ៉ីស្រាអែលបានរងការវាយប្រហារនៅកៀកឆ្នេរសមុទ្ររបស់ឥណ្ឌា កាលពីចុងសប្តាហ៍កន្លងទៅ។
សេចក្តីថ្លែងការណ៍របស់កងទ័ពជើងទឹកឥណ្ឌាបានឱ្យដឹងថា កងទ័ពជើងទឹកឥណ្ឌាកំពុងស៉ើបអង្កេតស្ថានភាពជាក់លាក់ជុំវិញករណីវាយប្រហារលើកប៉ាល់ដឹកសារធាតុគីមីឈ្មោះ MV Chem Pluto ដែលបានចូលចតនៅកំពង់ផែទីក្រុង Mumbai កាលពីថ្ងៃចន្ទ ខណៈរបាយការណ៍ដំបូងបានចង្អុលទៅកាន់ការវាយប្រហារដោយយន្តហោះដ្រូន។ សេចក្តីថ្លែងការណ៍ដដែលបានបន្តយ៉ាងដូច្នេះថា «ដោយសារមានករណីវាយប្រហារជាបន្តបន្ទាប់នៅម្តុំតំបន់សមុទ្រអារ៉ាប់ កងទ័ពជើងទឹកឥណ្ឌាបានសម្រេចចិត្តដាក់ពង្រាយនាវាបំពាក់មីស៉ីល INS Mormugao, INS Kochi និង INS Kolkata ទៅកន្លែងផ្សេងៗនៃតំបន់សមុទ្រនេះ ដើម្បីជាវិធានការទប់ស្កាត់»។
កាលពីថ្ងៃដដែល អ្នកនាំពាក្យក្រសួងការបរទេសអ៉ីរ៉ង់ បានចេញមុខច្រានចោលការអះអាងរបស់សហរដ្ឋអាមេរិក ដែលចោទថា ទីក្រុងតេហេរ៉ង់ ជាអ្នកនៅពីក្រោយការវាយប្រហារលើកប៉ាល់ MV Chem Pluto ដោយថា វាជាការចោទប្រកាន់គ្មានមូលដ្ឋាន។ ការបដិសេធនេះធ្វើឡើងក្រោយមន្ទីរបញ្ចកោណអាមេរិក បានអះអាងកាលពីថ្ងៃសៅរ៍សប្តាហ៍មុននេះ យន្តហោះដ្រូន១គ្រឿងដែលបាញ់ចេញពីប្រទេសអ៉ីរ៉ង់ បានវាយប្រហារចំកប៉ាល់នោះ នៅមហាសមុទ្រឥណ្ឌា ត្រង់ចំណុចមានចម្ងាយប្រហែល ៣៧០គីឡូម៉ែត្រពីឆ្នេរសមុទ្រឥណ្ឌា៕