សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ លោក ទូច សុឃៈ (សុខៈ) អ្នកនាំពាក្យរងក្រសួងមហាផ្ទៃ បានឱ្យដឹងនៅថ្ងៃទី២៣ ខែមេសា ឆ្នាំ២០២៤នេះថា ក្នុងរយៈពេល៥ថ្ងៃបន្ទាប់ពីបញ្ចប់ពិធីបុណ្យចូលឆ្នាំខ្មែរ ចាប់ពីថ្ងៃទី១៧ ដល់ថ្ងៃទី២១ ខែមេសា ឆ្នាំ២០២៤ កម្លាំងនគរបាលជាតិក្រសួងមហាផ្ទៃ បានបង្ក្រាបក្រុមក្មេងទំនើងចំនួន៤៣នាក់។
អ្នកនាំពាក្យរងក្រសួងមហាផ្ទៃរូបនេះ បន្ថែមថា ក្រុមក្មេងទំនើងទាំងនោះ បានប្រព្រឹត្តសកម្មភាពផ្សេងៗគ្នាចំនួន២២ករណី ហើយក្នុងចំណោមករណីសរុបនោះ គឺ រាជធានីភ្នំពេញ ខេត្តពោធិ៍សាត់ និងខេត្តកណ្ដាល មានច្រើនជាងគេ។
ក្មេងទំនើង ជាក្រុមយុវជនប្រព្រឹត្តសកម្មភាពប៉ះពាល់ដល់សន្តិសុខ សណ្ដាប់ធ្នាប់សាធារណៈ និងរបៀបរៀបរយសង្គម។ ក្នុងចំណោមការងារអាទិភាពចំនួន៦ ប្រមុខក្រសួងមហាផ្ទៃ បណ្ឌិត ស សុខា ក៏បានដៅយកការដោះស្រាយបញ្ហានេះដែរ។ សូមជម្រាបថា ករណីក្មេងទំនើងនៅតែកើតមានជាបន្តបន្ទាប់ ហើយក៏ត្រូវបានកម្លាំងនគរបាលបង្ក្រាបជាញឹកញាប់ផងដែរ ដោយឡែក កាលពីថ្ងៃ១៨ ដល់ថ្ងៃទី២៤ ខែមីនា ពោល គឺរយៈពេល១សប្តាហ៍ សមត្ថកិច្ចនគរបាលជាតិ ក្រសួងមហាផ្ទៃ ឃាត់ខ្លួនក្មេងទំនើងចំនួន ៧២នាក់ ក្នុងករណីផ្សេងៗគ្នាចំនួន២៥ ករណី៕
ដោយ៖ តារា
