សារព័ត៌មាន នគរវត្ត តែងតែនាំមុខគេជានិច្ច
Josko Gvardiol រកបានពីរគ្រាប់ក្នុងការប្រកួតកាលពីរាត្រីថ្ងៃទី១១ ឧសភា ខណៈដែលក្រុម Manchester City បានដាក់សម្ពាធលើ Arsenal ក្នុងការប្រជែងដណ្តើមពាន ដោយបានផ្តួលក្រុម Fulham ៤ទល់០ ដើម្បីរំកិល២ពិន្ទុដាច់នៅលើកំពូលតារាង Premier League ។
នៅក្នុងការប្រកួតសម្រាប់សប្តាហ៍ទី៣៦ ក្រុមភ្ញៀវ Man City បានបើកការស៊ុតបញ្ចូលទីនៅដើមតង់ទី១ មួយគ្រាប់ពេលដែលខ្សែការពារ Gvardiol បានរកគ្រាប់បាល់បញ្ចូលទីនៅនាទីទី១៣។ បន្ទាប់មកនៅតង់ទី២ Phil Foden បានបន្តទម្រង់លេងដ៏ល្អឥតខ្ចោះរបស់គាត់នៅរដូវកាលនេះជាមួយនឹងការរកគ្រាប់បាល់ទី២នៃការប្រកួតនេះនៅនាទីទី៥៩ដោយការបញ្ជូនបាល់ពី Bernardo Siva។
Erling Haaland គួរតែបន្ថែមគ្រាប់បាល់ទី៣នៅពាក់កណ្តាលតង់ទីពីរ ប៉ុន្តែអ្នកស៊ុតបញ្ចូលទីច្រើនជាងគេនៅ Premier League រូបនេះបានស៊ុតមិនចំគោលដៅទៅវិញ។
ប៉ុន្តែ Manchester City នៅតែបន្តដាក់សម្ពាធលើក្រុមម្ចាស់ផ្ទះ រហូតដល់នាទីទី៧១ Gvardiol បានស៊ុតបំប៉ោងសំណាញ់ទីគ្រាប់ទី៣លើក្រុមFulham។
កីឡាករ Issa Diop របស់ Fulham ត្រូវបានកាតលឿងជាលើកទីពីរក្នុងពេលប្រកួត ហើយក៏ទទួលបានកាតក្រហមនៅនាទីទី៩០+៥ នៅពេលដែលប៉ះទង្គិចជាមួយ Julain Alvarez នៅខាងក្នុងប្រអប់ ហើយត្រូវអាជ្ញាកណ្តាលផ្តល់បាល់ពិន័យប៉េណាល់ទីដែលស៊ុតគ្រាប់ទី៤នេះដោយកីឡាករ Julain Alvarez រហូតដល់ចប់ការប្រកួត ក្រុមភ្ញៀវ Man City យកឈ្នះ Fulham ៤ទល់០។
លទ្ធផលនេះមានន័យថា ក្រុមកាំភ្លើងធំត្រូវធ្វើដំណើរទៅជួប Manchester United នៅថ្ងៃអាទិត្យនេះត្រូវការឈ្នះ ដើម្បីប្រាកដក្នុងការប្រជែងយកពានទៅថ្ងៃចុងក្រោយនៃរដូវកាល។
Manchester City ក៏ត្រូវប្រកួតក្នុងទឹកដី Tottenham នៅថ្ងៃអង្គារ ហើយប្រសិនបើ Arsenal បរាជ័យក្នុងការទទួលបានលទ្ធផលវិជ្ជមាននៅ Old Trafford នោះជ័យជម្នះនឹងឈ្នះពានរង្វាន់ Premier League ជាលើកទី៤ជាប់ៗគ្នាសម្រាប់ក្រុមរបស់លោក Guardiola ។
ការដាក់ពិន្ទុរបស់ Arsenal ក្នុងដំណាក់កាលដ៏សំខាន់នៃការប្រណាំងប្រជែងដណ្តើមពានកាលពីរដូវកាលមុន មានន័យថា ជាការឈ្នះដ៏ងាយស្រួលសម្រាប់ Manchester City ប៉ុន្តែលើកនេះ ពួកគេត្រូវបានរុញច្រានកាន់តែខ្លាំងដោយបុរសរបស់ Mikel Arteta ហើយលោក Guardiola បានសង្កត់ធ្ងន់កាលពីដើមសប្តាហ៍នេះថា មិនអាចមានកំហុសឆ្គងក្នុងការស្វែងរកពានរង្វាន់លីកមួយផ្សេងទៀតនោះទេ។
Arsenal នៅតែស្ថិតក្នុងការប្រជែងដណ្តើមពានច្រើន ហើយការឈ្នះពេលប្រកួតជាមួយ Manchester United នៅថ្ងៃអាទិត្យនេះនឹងដាក់សម្ពាធលើ Man City ប៉ុន្តែបើក្រុមកាំភ្លើងធំបរាជ័យនោះ ក្រុមរបស់លោក Guardiola នឹងលើកពាន Premier League នៅរដូវកាលនេះជាមិនខាន ៕
ដោយ៖ ភារៈ(រូបភាព ៖ BBC Sport)
