សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់បេីករថយន្តកាមរីមួយគ្រឿងពាក់ផ្លាកលេខ ខេមរភូមិន្ទបាន ជ្រុលទៅបុកគល់ស្ពានអាកាសស្ទឹងមានជ័យពេញទំហឹងបណ្ដាលឱ្យរងការខូចខាតយ៉ាងដំណំ។ ហេតុការណ៍នេះ បានកើតឡេីងកាលពីវេលាម៉ោង៧ និង១០នាទីយប់ថ្ងៃទី២១ ខែកញ្ញា ឆ្នាំ២០២៤ នៅចំណុចស្ពានអាកាសស្ទឹងមានជ័យ តាមផ្លូវលេខ២៧១ សង្កាត់ទំនប់ទឹក ខណ្ឌបឹងកេងកង រាជធានីភ្នំពេញ ។
តាមប្រភពព័ត៌មានពីកន្លែងកេីតហេតុបានឱ្យដឹងថា មុនកេីតហេតុ គេឃេីញរថយន្តមួយគ្រឿងម៉ាកកាមរីហាយប្រ៊ីដ ពណ៌ប្រផេះពាក់ផ្លាកលេខខេមរភូមិន្ទ០២ ២-១០០៥ បេីកបរដោយបុរសម្នាក់វ័យប្រហែល៤០ឆ្នាំ ក្នុងទិសដៅពីត្បូងទៅជេីងតាមបណ្ដោយផ្លូវលេខ២៧១ ដោយមេឃកំពុងភ្លៀងផងនោះ ស្រាប់តែរថយន្តរេចង្កូតទៅបុកគល់ស្ពានអាកាសស្ទឹងមានជ័យពេញទំហឹងបណ្ដាលឱ្យរថយន្តខ្ទាតថយក្រោយវិញគាំងបើកទៅមុខលែងរួច ផ្ទុះពោងសុវត្ថិភាពរងការខូចខាតយ៉ាងដំណំ ។ ចំណែកអ្នកបេីកបររងរបួសស្រាល ។
ក្រោយកេីតហេតុ សមត្ថកិច្ចប៉ុស្តិ៍នគរបាលរដ្ឋបាលទំនប់ទឹក និងមន្ត្រីជំនាញចរាចរណ៍បានចុះមកដល់កន្លែងកើតហេតុ និងធ្វេីការវាស់វែងយករថយន្តបង្កនិងនាំអ្នកបេីកបរទៅកាន់អធិការដ្ឋាននគរបាលខណ្ឌបឹងកេងកង រង់ចាំដោះស្រាយតាមក្រោយ ៕
ដោយ ៖ ភារ៉ា ដង្កោ
