សារព័ត៌មាន នគរវត្ត តែងតែនាំមុខគេជានិច្ច
ប្រទេសដាណឺម៉ាក៖ ក្រសួងធនធានទឹក និងឧតុនិយម នៅព្រឹកថ្ងៃសៅរ៍ទី០៥ ខែតុលា ឆ្នាំ២០២៤នេះ បានឱ្យដឹងថា ក្នុងឱកាសបំពេញបេសកកម្មការងារនៅសហភាពអឺរ៉ុប លោក ចាន់ ស៊ីណាត រដ្ឋលេខាធិការ ក្នុងនាមតំណាង លោក ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម កាលពីម្សិលមិញនេះ បានបន្តដឹកនាំគណៈប្រតិភូក្រសួងធ្វើដំណើរទស្សនកិច្ចទៅកាន់ប្រទេសដាណឺម៉ាក។
នាឱកាសនោះ លោករដ្ឋលេខាធិការ បានឱ្យដឹងថា ដំណើរទស្សនកិច្ចទៅកាន់ប្រទេសដាណឺម៉ាក គឺដើម្បីពិនិត្យស្វែងយល់លើរោងចក្រផលិតស្ថានីយបូមទឹកដ៏ទំនើបរបស់ប្រទេសក្នុងសហភាពអឺរុបមួយនេះ ហើយដែលកំពុងប្រើប្រាស់នៅតាមប្រទេសនានាលើពិលោក ជាពិសេសបណ្តាប្រទេសដែលស្ថិតក្នុងសហគមន៍អឺរ៉ុប អាហ្វ្រិក និងអាស៊ី។
ជាមួយគ្នានេះ លោករដ្ឋលេខាធិការ បានគូសបញ្ជាក់ឱ្យដឹងថា ស្ថានីយបូមទឹកខាងលើបានប្រើប្រាស់នៅក្នុងការធ្វើទំនើបកម្មប្រព័ន្ធធារាសាស្រ្តព្រែកពោធិ ក្នុងស្រុកស្រីសន្ធរ ខេត្តកំពង់ចាម សម្រេចបានលទ្ធផលជោគជ័យល្អប្រសើរ ហើយនឹងបន្តធ្វើទំនើបកម្មលើប្រព័ន្ធធារាសាស្រ្តប្រឡាយលេខ១៥ ក្នុងក្រុងដូនកែវ ស្ថានីយបូមទឹកសាមពុធ ក្នុងស្រុកទ្រាំង ខេត្តតាកែវ។
លោករដ្ឋលេខាធិការ បានបញ្ជាក់បន្ថែមថា ស្ថានីយនេះនឹងប្រើប្រាស់ក្នុងការអនុវត្តកសាងស្ថានីយបូមទឹកក្នុងនិយាមខាងលើដដែលនៅក្នុងយុទ្ធសាស្រ្តរំដោះទឹក និងពង្វាងទឹកចេញពីគ្រប់ខេត្ត-ក្រុងនៃព្រះរាជាណាចក្រកម្ពុជា និងដើម្បីទប់ទល់នឹងការប្រែប្រួលអាកាសធាតុ ជាពិសេសគ្រោះធម្មជាតិដែលកើតឡើងដោយសារជំនន់គ្រប់ប្រភេទ និងធ្វើការដោះស្រាយបញ្ហាគ្រោះរាំងស្ងួតដែលតែងតែយាយីនៅរដូវប្រាំង៕
ដោយ៖ តារា
