សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ រថយន្តតូយ៉ូតាព្រុសបេីកលឿនខ្វះការប្រុងប្រយ័ត្ននៅផ្លូវបំបែកជាបួនក៏បានជ្រុលទៅបុករថយន្តឡិចស៊ីសRX330 បណ្តាលឲ្យរថយន្តឡិចស៊ីសរេចង្កូតជ្រុលទៅបុកចូលហាងស៊ុបមួយកន្លែងនៅក្បែរនោះរងការខូចខាតយ៉ាងដំណំតែម្ដង។
ហេតុការណ៍នេះបានកេីតឡេីងនៅវេលាម៉ោង២និង៤០នាទីរំលងអធ្រាត្រឈានចូលថ្ងៃទី៦ខែធ្នូឆ្នាំ២០២៤ នៅចំនុចផ្លូវលេខ៩៩កែងផ្លូវលេខ៤៦៦ សង្កាត់បឹងត្របែក ខណ្ឌចំការមន រាជធានីភ្នំពេញ ។
តាមប្រភពព័ត៌មានពីកន្លែងកើតហេតុ បានឲ្យដឹងថា មុនពេលកេីតហេតុគេបានឃើញបុរសម្នាក់បេីករថយន្តម៉ាក ឡិចស៊ីសRX330 ពណ៌ផ្សែងបារី ពាក់ស្លាកលេខ ភ្នំពេញ 2AH-3768 បេីកតាម បណ្ដោយផ្លូវលេខ៤៦៦ក្នុងទិសដៅពីលិចទៅកេីត លុះមកដល់ចំណុចកេីតហេតុដែលជាផ្លូវបំបែកជាបួនក៏ស្រាប់តែមានបុរសម្នាក់ទៀតបានបេីករថយន្តម៉ាកតូយូ៉តាព្រុស ពណ៌ស ពាក់ស្លាកលេខភ្នំពេញ2BV-6141 ធ្វើដំណើរតាមបណ្ដោយផ្លូវលេខ៩៩ក្នុងទិសដៅពីត្បូងទៅជេីងដោយល្បឿនលឿនព្រមទាំងខ្វះការប្រុងប្រយ័ត្នដូចគ្នា ក៏ជ្រុលទៅបុករថយន្តឡិចស៊ីសចំថ្ពាល់មុខចំហៀងខាងស្តាំយ៉ាងពេញទំហឹង បណ្តាលឲ្យរថយន្តឡិចស៊ីស រេចង្កូតបុកទម្លុះចូលទៅក្នុងហាងលក់ស៊ុប យីហោលីធីងដែលនៅក្បែរនោះរងការខូចខាតសម្ភារអស់មួយចំនួនធំ បេីគិតជាលុយខ្ទង់ពាន់ដុល្លារ ព្រមទាំងធ្វើឱ្យរថយន្តខ្ទេចផែ្នកខាងមុខ តែមិនមានគ្រោះថ្នាក់ដល់មនុស្សឡើយ។
ដោយឡែកខាងរថយន្តតូយ៉ូតាព្រុសវិញរងការខូចខាតខ្ទេចផែ្នកខាងមុខបត់ក្បាលត្រលប់ក្រោយវិញ តែមិនមានគ្រោះដល់មនុស្សដូចគ្នា ។
ក្រោយពេលកេីតហេតុ ដោយសារការដោះស្រាយគ្នាមិនត្រូវ មធ្យោបាយទាំងអស់ត្រូវសមត្ថកិច្ចមូលដ្ឋានប្រគល់អោយផ្នែកជំនាញចរាចរណ៍ផ្លូវគោកធ្វើការវាស់វែងយកទៅរក្សាទុកនៅដេីម្បីរង់ចាំដំណោះស្រាយនៅពេលក្រោយជាបន្តទៀត ៕
ដោយ៖សុខាសែនជ័យ
