សារព័ត៌មាន នគរវត្ត តែងតែនាំមុខគេជានិច្ច
ខេត្តក្រចេះ ៖ លោក គង់ គឹមនី អភិបាលរងខេត្តក្រចេះ និងជាប្រធានក្រុមការងារត្រួតពិនិត្យយានយន្តកែច្នៃខុសលក្ខណៈបច្ចេកទេសថ្នាក់ខេត្ត បានឱ្យដឹងថា៖ គិតត្រឹមរយៈពេល៥ថ្ងៃ នៅដើមខែធ្នូ ឆ្នាំ២០២៤នេះ មានរថយន្តខុសលក្ខណៈបច្ចេកទេស ចំនួន ៩៧គ្រឿងរួចមកហើយ ដែលត្រូវបានក្រុមការងារត្រួតពិនិត្យយានយន្តកែច្នៃថ្នាក់ខេត្ត ធ្វើការឃាត់ និងបញ្ជារឲ្យកាត់ទ្រុងនៅនឹងកន្លែង។ ការចុះឃាត់រថយន្តទាំងនេះ បន្ទាប់ពីលោក វ៉ា ថន អភិបាលខេត្តក្រចេះ ធ្វើការអំពាវនាវចំពោះម្ចាស់រថយន្ត និងអ្នកបើកបររថយន្តទាំងអស់ មិនឲ្យមានការកែច្នៃ តទ្រុង និងដឹកផ្ទុកទំនិញសំពីងសំពោង ខុសលក្ខណៈបច្ចេកទេស កាលពីពេលថ្មីៗកន្លងទៅនេះ។
លោក គង់ គឹមនី បានឱ្យដឹងទៀតថា ដោយមានការណែនាំ និងដាក់ទិសដៅបន្ថែម ពីលោក វ៉ា ថន អភិបាលខេត្ត និងជាប្រធានគណៈបញ្ជាការឯកភាពខេត្ត ក្រុមការងារចម្រុះ បានដាក់គោលដៅចំនួន ២ ក្នុងភូមិសាស្ត្រខេត្តក្រចេះ។
លោកអភិបាលរូបនេះ បានបន្តថា គិតចាប់ពីថ្ងៃទី ៥ ដល់ថ្ងៃទី៩ ខែធ្នូ ឆ្នាំ២០២៤នេះ ក្រុមការងារត្រួតពិនិត្យយានយន្តថ្នាក់ខេត្ត និងក្រុមការងារស្រុកស្នួល ខាងកាត់ទ្រុង បានដាក់គោលដៅត្រួតពិនិត្យ នៅស្រុកឆ្លូង និងស្រុកស្នួល។ ត្រួតពិនិត្យរថយន្តសរុបបានចំនួន ១១៨គ្រឿង ក្នុងនោះ ឃាត់បានរថយន្តខុសលក្ខណៈបច្ចេកទេស ចំនួន ៩៧គ្រឿង រួមមាន៖ រថយន្តតទ្រុងខុសលក្ខណៈបច្ចេកទេស តម្រូវឲ្យកាត់ទ្រុងតចេញនៅនឹងកន្លែងត្រួតពិនិត្យ ចំនួន ១៥គ្រឿង ដោះភ្លើងហ្វាបំភ្លឺ ចំនួន ៤គ្រឿង និងរថយន្តឯកសារមិនគ្រប់គ្រាន់ ចំនួន ៧៨គ្រឿង។
បន្ថែមពីនេះ អភិបាលរងខេត្ត បានបញ្ជាក់ថា ក្រុមការងារបានណែនាំដល់អ្នកបើកបរ ឬម្ចាស់រថយន្ត មិនត្រូវតទ្រុងបន្តទៀត មិនត្រូវផ្ទុកទំនិញសំពីងសំពោង មិនត្រូវបំពាក់ភ្លើងបំភ្លឺខុសបច្ចេកទេស រថយន្តត្រូវភ្ជាប់មកជាមួយនូវឯកសារគ្រប់គ្រាន់។ ក្នុងករណីម្ចាស់រថយន្តមិនអនុវត្តតាមការណែនាំ ក្រុមការងារនឹងអនុវត្តទៅតាមច្បាប់៕
ដោយ៖ តារា
