រថយន្តស៊េរីទំនើប៣គ្រឿង បានបុកបន្តកន្ទុយគ្នា បណ្ដាលឲ្យរងការខូចខាត

ភ្នំពេញ ៖ រថយន្តស៊េរីទំនើប៣គ្រឿងបាន បុកបន្តកន្ទុយគ្នាបណ្ដាលឲ្យរងការខូតខាតទាំងអស់ ។ ហេតុការណ៍ កាលពីវេលាម៉ោង១០យប់ ថ្ងៃទី២៦ ខែសីហា ឆ្នាំ២០១៦ នៅផ្លូវខាងក្រោយ ឈៀងខាងជើង ស្ថានទូតអូស្ត្រាលី ស្ថិតក្នុងសង្កាត់ទន្លេបាសាក់  ខណ្ឌចំការមន រាជធានីភ្នំពេញ ។

តាមប្រភពពីកន្លែងកើតហេតុ បានឲ្យដឹងថា នៅមុនពេលកើតហេតុ គេឃើញរថយន្ត ឡិចស៊ីស RX 300 ពណ៌ស មួយគ្រឿង បើកបរដោយបុរសម្នាក់ យ៉ាងលឿន ទំនងជាស្រវឹង បើកតាមបណ្តោយផ្លូវកើតហេតុខាងលើ ទិសដៅពីលិចទៅកើត ខណៈមកដល់ចំណុចកើតហេតុ រថយន្តបានរេចង្កូតទៅបុកពីក្រោយរថយន្ត ឡង់គ្រីសឺ ពាក់ស្លាកលេខ ភ្នំពេញ 2AC-3888 ដែលចតចោលនៅផ្លូវអែបខាងស្តាំដៃ បណ្តាលឲ្យដាច់ធ្លាក់កាង និងបែកស្តុបពីក្រោយ តែដោយល្បឿនរបស់រថយន្តឡិចស៊ីស RX 300 លឿន បានរុញរថយន្តឡង់គ្រីសឺ ទៅបុកផ្ទប់ពីក្រោយរថយន្ត ម៉ាក ផច់ ស្លាកលេខ ភ្នំពេញ 1AV-8787 បណ្តាលឲ្យរថយន្តឡង់គ្រីសឺ ខូតខាតពីមុខបន្ថែមទៀត ចំណែករថយន្ត ផច់ កំពិតបាក់កាងក្រោយ ។

ក្រោយពេលកើតហេតុ សមត្ថកិច្ចមូលដ្ឋានបានទៅដល់កន្លែងកើតហេតុ តែភាគីទាំង៣ បានសុំចរចាគ្នា ក្រោយមកដោយកចរចាគ្នាជាងមួយម៉ោង មិនត្រូវរ៉ូវគ្នា ទើបសមត្ថកិច្ចជំនាញ មកវាស់វែងយករថយន្តទាំង៣ទៅអធិការដ្ធាន នគរបាលខណ្ឌចំការមនដើម្បីរង់ចាំការដោះស្រាយ ៕ ជីម ភារ៉ា ដង្កោ