សារព័ត៌មាន នគរវត្ត តែងតែនាំមុខគេជានិច្ច
ខេត្តពោធិ៍សាត់៖ ម៉ូតូធុនធំពណ៌ត្រេអ៊ីមួយគ្រឿង បើកបុកម៉ូតូសណ្ដោងរ៉ីម៉ក បណ្ដាលឲ្យរងបួសស្រាល ធ្ងន់ចំនួន៣នាក់ ខណៈកំពុងធ្វើដំណើរស្របទិសគ្នានៅកំលើណាត់ផ្លូវជាតិលេខ៥ ។
ហេតុការណ៍នេះ បានកើតឡើងកាលពីវេលាម៉ោង១៨និង១០នាទី ថ្ងៃទី៧ ខែតុលា ឆ្នាំ២០១៦ ត្រង់ចន្លោះ បង្គោលគីឡូម៉ែត្រលេខ ១៣៨-១៣៩ ស្ថិតក្នុងភូមិអារ៉ងព្រួច ឃុំអន្សាចំបក់ ស្រុកក្រគរ ខេត្តពោធិ៍សាត់ ។
អាជ្ញាធរមានសមត្ថកិច្ចបានឲ្យដឹងថាម្ចាស់បើកបរ ម៉ូតូម៉ាក KAVASAKY ១៣៥ ពណ៏ត្រេអុី និងបិតអក្សរ (អគ្គបញ្ជាការ) ពាក់ស្លាកលេខ ភ្នំពេញ 1CU 9839 មិនទាន់ត្រូវបាន គេស្គាល់អត្តសញ្ញាណនៅឡើយទេ (របួសធ្ងន់) ចំណែកអ្នកបើកបរ ម៉ូតូសណ្ដោងរ៉ីម៉ក ត្រូវបានគេស្គាល់ឈ្មោះ ឈន ចាន់ ភេទប្រុស អាយុ ១៨ឆ្នាំ បច្ចុប្បន្នរស់នៅភូមិ-ឃុំឆ្នុកទ្រូ ស្រុកបរិបូរណ៍ ខេត្តកំពង់ឆ្នាំង (របួសស្រាល) និងអ្នករួមដំណើរឈ្មោះ ពឿន ពុធ ភេទស្រី អាយុ៣៨ឆ្នាំ បច្ចុប្បន្នរស់នៅភូមិផ្គោលតូច ឃុំអន្សាចំបក់ ស្រុកក្រគរ ខេត្តពោធិ៍សាត់(របួសធ្ងន់) ។
ប្រភពព័ត៌មានខាងលើបន្តថា ជនរងរបួសត្រូវបានរថយន្តសង្រ្គោះដឹកយកទៅមន្ទីរពេទ្យខេត្ត ហើយមុនដំបូង គេឃើញម៉ូតូធុនធំខាងលើ ធ្វើដំណើរក្នុងទិសដៅពីកើតទៅលិច លុះមកដល់ចំណុចកើតហេតុ បានបុកម៉ូតូសណ្ដោងរ៉ីម៉កពីក្រោយពេញទំហឹង បណ្ដាលឲ្យរងរបួស រដូករណេលនៅលើផ្លូវតែម្តង ។
ប្រភពដដែលបន្តទៀតថា ចំពោះករណីហេតុការណ៍នេះ កំលាំងសមត្ថកិច្ចបានយកវត្ថុតាងទាំងម៉ូតូធំ និងម៉ូតូសន្ដោងរ៉ីម៉កទៅរក្សាទុក ដើម្បីរង់ចាំវាស់វែង និងដោះស្រាយគ្នាជាក្រោយតាមនីតិវិធី ៕ បឹុម ពិន
