សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ បុរសម្នាក់រងរបួសបាក់ជើង ហូរឈាមសន្លប់ស្ដូកស្ដឹង ខណៈកំពុងជិះម៉ូតូត្រូវគោយន្តដឹកដីបើកបុកពេញទំហឹងកាលពីវេលាម៉ោង១២ថ្ងៃ ថ្ងៃទី២៣ ខែតុលា ឆ្នាំ២០១៦ នៅលើផ្លូវលេខជាតិលេខ១ ក្នុងភូមិបាវិតកណ្ដាល សង្កាត់បាវិត ក្រុងបាវិត ខេត្តស្វាយរៀង ។
តាមសមត្ថកិច្ចនគរបាលក្រុងបាវិតបានឲ្យដឹងថា មុនពេលកើតហេតុ គោយន្ដ១គ្រឿង ពណ៌ស្លែ ផ្លាកលេខគ្មាន បើកបរដោយឈ្មោះស៊ីម កូរ៉ា ភេទប្រុស អាយុ៣១ឆ្នាំ មុខរបរបើកបរគោយន្តដឹកដី រស់នៅផ្ទះលេខ៥A ផ្ផូវ៥២៨ សង្កាត់ទឹកល្អក់២ ខណ្ឌទួលគោក រាជធានីភ្នំពេញ បើកបរពីជើងទៅត្បូង លុះមកដល់ ចំណុចកើតហេតុ ខាងលើ ក៏ទៅបុកនឹងម៉ូតូម៉ាក WAVE អាល់ហ្វា ពណ៌ខៀវ ពាក់ស្លាកលេខ វៀតណាម 70-L9 1062 បើកបរដោយឈ្មោះកែវ ឈន ភេទប្រុស អាយុ៤៩ឆ្នាំ មុខរបរកសិករ រស់នៅភូមិបាវិតលើ សង្កាត់បាវិត ក្រុងបាវិត បើកបរពីកើតទៅលិច ក៏បុកយ៉ាងពេញទំហឹងតែម្ដង បណ្ដាលឲ្យជនរងគ្រោះ បាក់កំភួនជើងស្ដាំសន្លប់នឹងកន្លែង ។
ក្រោយពីកើតហេតុភ្លាម អ្នកបើកបរគោយនឃើញសភាពមិនស្រួលបានរត់គេចខ្លួនបាត់ បន្សល់ទុកតែគោយន្ត ។
បច្ចុប្បន្ន អ្នករងរបួសត្រូវបានបញ្ជូនទៅមន្ទីរពេទ្យប្រទេសវៀតណាមភ្លាមៗ រីឯមធ្យោបាយទាំង២គ្រឿង សមត្ថកិច្ចយកទៅរក្សាទុកនៅប៉ុស្ដិ៍សង្កាត់បាវិត ដើម្បីបំពេញសំណុំរឿងតាមច្បាប់ ។
សមត្ថកិច្ចនគរបាលបន្ថែមថា មូលហេតុកើតឡើងដោយសារគោយន្ដបើកបរមិនគោរពសិទ្ធិអាទិភាព ៕ យឹម សុថាន
