សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសជនជាតិបរទេសម្នាក់រងរបួសជើងខាងឆ្វេង ខណៈជិះម៉ូតូធុនធំមួយគ្រឿងឌុបនារីម្នាក់ហើយត្រូវរថយន្តម៉ាសស្តាបុកចំពីចំហៀងពេញទំហឹង កាលពីវេលាម៉ោង១រំលងអធ្រាត្រឈានចូលថ្ងៃទី១០ ខែវិច្ឆិកា ឆ្នាំ២០១៦ នៅចំណុចផ្លូវលេខ១៣កែងផ្លូវលេខ១៣៦ ស្តិតក្នុងសង្កាត់ផ្សារកណ្តាលទី១ ខណ្ឌដូនពេញ រាជធានីភ្នំពេញ ។
តាមសាក្សីនៅកន្លែងកើតហេតុបានអោយដឹងថា នៅមុនពេលកើតហេតុគេបានឃើញម៉ូតូធុនធំមួយគ្រឿង ពណ៍ខៀវ ពាក់ស្លាកលេខ ភ្នំពេញ1CB-0001 បើកបរដោយបុរសម្នាក់ឌុបនារីម្នាក់ធ្វើដំណើរតាមបណ្តោយផ្លូវលេខ១៣ក្នុងទិសដៅពីជើងទៅត្បូងខណៈមកដល់ចំណុចកើតហេតុស្រាប់តែមានរថយន្តម៉ាកម៉ាស្តា ពណ៌ទឹកប្រាក់ ពាក់ស្លាកលេខ រដ្ឋ21-2-0666 បើកបរដោយបុរសម្នាក់ធ្វើដំណើរតាមបណ្តោយផ្លូវលេខ១៣៦ក្នុងទិសដៅពីកើតទៅលិចដោយបញ្ច្រាសទិសដៅចរាចរណ៍ ហើយក៏បានបុកម៉ូតូចំពីចំហៀងពេញទំហឹងបណ្តាលឲ្យបុរសជាអ្នកបើកម៉ូតូរងរបួសជើងខាងឆ្វេងដើរលែងរួចចំណែកម៉ូតូរងការខូចខាតយ៉ាងដំណំ ។
ក្រោយពេលកើតហេតុ សមត្ថកិច្ចបានចុះមកដល់ចំណុចកើតហេតុ និងសម្របសម្រួលដោយភាគីខាងម៉ូតូទាមទារថ្លៃជំងឺចិត្តចំនួន៥០០០ដុល្លារ ទើបភាគីខាងរថយន្តមិនមានលទ្ធភាពសងទើបសមត្ថកិច្ចវាស់វែងយកទៅរក្សារទុក្ខនៅការិយ៉ាល័យចរាចរណ៍ជើងគោករាជធានីរងចាំដោះស្រាយពេលក្រោយ ៕ សុខាសែនជ័យ
