ទំនងងងុយដេកបើករថយន្តកាមរីហាយព្រីដជ្រុលចង្កូតទៅបុកបង្គោលច្រវាក់របងស្ថានទូតបារាំង​បាក់អស់៣កង់​

ភ្នំពេញ៖ បុរសម្នាក់ទំនងជាងងុយដេក បានបើករថយន្តកាមរីហាយព្រីដក្នុងល្បឿនយ៉ាងលឿន ខណៈមកដល់ចំណុចមុខស្ថានទូតបារាំង ក៏រេចង្កូតទៅបុកបង្គោលរបងស្ថានទូបារាំង បណ្ដាលឲ្យបាក់អស់៣កង់ ចំណែករថយន្តបង្ករងការខូចខតខាងមុខយ៉ាងដំណំ ។

ហេតុការណ៍គ្រោះថ្នាក់ចរាចរណ៍ខាងលើនេះ បានកើតឡើងនៅវេលាម៉ោង៤និង៤០នាទីទៀបភ្លឺ ឈានចូលថ្ងៃទី១៩ ខែវិច្ឆិកា ឆ្នាំ២០១៦ នៅចំណុចមុខស្ថានទូតបារាំង ស្ថិតក្នុងសង្កាត់ស្រះចក ខណ្ឌដូនពេញ រាជធានីភ្នំពេញ ។

តាមប្រភពព័ត៌មានពីប្រជាពលរដ្ឋដែលធ្វើដំណើរឆ្លងកាត់កន្លែងកើតហេតុបានឲ្យដឹងថា ដំបូងគេសង្កេតឃើញ រថយន្តបង្កម៉ាកកាមរីហាយព្រីដ ពណ៌ស្ក ពាក់ស្លាកលេខ ភ្នំពេញ 2Y.3225 ដែលបើកបរដោយបុរសម្នាក់ទំនងជាងងុយដេក ធ្វើដំណើតាមបណ្ដោយផ្លូវព្រះមុនីវង្ស ទិសដៅពីជើងទៅត្បួងក្នុងល្បឿនលឿន ខណៈមកដល់ចំណុចកើតហេតុ ក៏រេចង្កូតជ្រុលទៅបុកបង្គោលរបងដាក់ច្រវាក់ស្ថានទូតបារាំងពេញទំហឹង បណ្ដាលឲ្យបាក់អស់៣កង់ រីឯរថយន្តបង្កបានដាច់ការឡែកង់មុខផ្នែកខាងស្ដាំ ទៅមុខលេងរួច ។ ដោយឡែកម្ចាស់រថយន្តបង្កវិញ សំណាងមិនរងរបួស ហើយក្រោយពីកើតហេតុភ្លាមៗបានចុះគេចខ្លួនបាត់ស្រមោល ។

បន្ទាប់មកសមត្ថកិច្ចមូលដ្ឋានបានចុះមកដល់កន្លែងកើតហេតុ និងទំនាក់ទំនងទៅជំនាញ ឲ្យមកវាស់វែងយករថយន្តបង្កខាងលើទៅរក្សាទុកនៅការិយាល័យចរាចរណ៍ជើងគោករាជធានីភ្នំពេញ រងចាំម្ចាស់ចូលខ្លួនដោះស្រាយតាមនីតិវិធីច្បាប់ ៕ ជីម ភារ៉ា ដង្កោ