សារព័ត៌មាន នគរវត្ត តែងតែនាំមុខគេជានិច្ច
ទាំងនោះជាសកម្មភាពដ៏ល្អប្រសើរមួយ របស់ប្រធានាធិបតី ពូទីន ចង់ផ្សះផ្សាទំនាក់ ទំនងជាមួយអាមេរិកក្នុងពេលដែលលោក អូបាម៉ា ជិតបញ្ចប់អាណត្តិត្រូវផ្លាស់ប្តូរទៅឲ្យលោក ដូណាល់ ត្រាំ វិញ។ នៅក្នុងជំនួប រយៈពេលខ្លីកន្លងមក លោក ពូទីន បាន ប្រកាសថា បានអញ្ជើញលោក អូបាម៉ា ទស្សនកិច្ចទៅកាន់រុស្ស៊ីគ្រប់ពេលដែលលោក អូបាម៉ា អាចទៅបាន។
មេដឹកនាំរុស្ស៊ីបាននិយាយទៅកាន់ក្រុម អ្នកសារព័ត៌មានថា «យើងបានឯកភាពគ្នាបើទោះបីការពិតកិច្ចពិភាក្សារវាងយើងទាំង ពីរមិនអាចទៅមុខរលូននៅមានចំណុចជាច្រើនខ្វែងគំនិតគ្នា តែយើងចាំបាច់ត្រូវតែ ជជែកគ្នាដើម្បីកាត់បន្ថយគម្លាតនៃវិវាទ កន្លងមក»។ លោក ពូទីន បញ្ជាក់ទៀតថា «ខ្ញុំសូមអរគុណគាត់ (អូបាម៉ា) ដែលច្រើន ឆ្នាំមកនេះបានខិតខំធ្វើការជាមួយគ្នា។ ខ្ញុំពិតជាមានភាពសប្បាយរីករាយយ៉ាងខ្លាំងដែលបានស្វាគមន៍គាត់នៅក្នុងប្រទេស រុស្ស៊ីនៅពេលណាដែលគាត់ចង់»។
រយៈពេលកន្លងមកទំនាក់ទំនងរវាងអាមេរិកនឹងរុស្ស៊ីតានតឹងបំផុតមិនធ្លាប់មាន ដោយសារតែវិបត្តិនៅក្នុងប្រទេសអ៊ុយក្រែន និងស៊ីរី។ ទំនាក់ទំនងរវាងរុស្ស៊ីនឹងអាមេរិក កាន់តែតានតឹងនៅពេលដែលរុស្ស៊ីបាន សម្រេចបញ្ជូនទាហានទៅកាន់ប្រទេស ស៊ីរីវាយប្រហារទៅលើក្រុមភេរវកម្ម និង ជួយដល់រដ្ឋាភិបាលលោក អាល់អាសាដ វាយប្រហារទៅលើកម្លាំងទាហានក្រុមបះបោរដែលគាំទ្រដោយអាមេរិកនិងលោកខាងលិច។
ការប្រកាសដោយបើកចំហអញ្ជើញ ប្រធានាធិបតីអាមេរិកទស្សនកិច្ចទៅកាន់ រុស្ស៊ីជាលើកចុងក្រោយនេះជាសញ្ញាមួយបានបង្ហាញឲ្យឃើញថា រុស្ស៊ីចង់ផ្សះផ្សា ទំនាក់ទំនងដ៏ពិតប្រាកដជាមួយអាមេរិកនៅពេលអនាគត ពិសេសគឺក្រោយពេល ដែលលោក ដូណាល់ ត្រាំ ឡើងកាន់តំណែង ប្រធានាធិបតីអាមេរិកនៅថ្ងៃទី២០ ខែមករា ឆ្នាំ២០១៧ ខាងមុខ៕ ម៉ែវ សាធី
