សារព័ត៌មាន នគរវត្ត តែងតែនាំមុខគេជានិច្ច
ខេត្តបាត់ដំបង៖ ជនសង្ស័យគ្រឿងញៀនម្នាក់ធ្លាប់ជាប់គុក២លើកជាប់ពាក់ព័ន្ធ និងជួញដូរគ្រឿងញៀនខុសច្បាប់ចេញពីគុកមកវិញ មិនរាងចាលបន្តធ្វើសកម្មភាពលក់ចែកចាយថ្នាំញៀនត្រូវបានកម្លាំងអាវុធហត្ថខេត្តបាត់ដំបងចេញប្រតិបត្តិការបង្រ្កាបចាប់ឃាត់ខ្លួនយកទៅផ្តន្ទាទោសតាមផ្លូវចាប់ជាលើកទី៣បន្ថែមទៀត។
ក្នុងនោះអាវុធហត្ថបានធ្វើការឆែកឆេរដកហូតបានថ្នាំញៀនមួយចំនួនធំដែលគេលាក់ទុកក្នុងរថយន្តខណៈដែលជនសង្ស័យជិះរថយន្ត១គ្រឿងចេញពីខេត្តបន្ទាយមានជ័យឆ្ពោះមក ផ្ទះរបស់ខ្លួននៅស្រុកបវេល។ ប្រតិបត្តិការបង្រ្កាបជនសង្ស័យគ្រឿងញៀនពីកម្លាំងអាវុធហត្ថខេត្តបាត់ដំបង បានសម្រេចនៅពេលនេះ ដោយអនុវត្តតាមបទបញ្ជាផ្ទាល់របស់លោកឧត្តមសេនីយ៍ត្រី ប៉ោ វណ្ណៈ មេបញ្ជាការកងរាជអាវុធហត្ថខេត្តបាត់ដំបង ។
ប្រតិការនោះដែរជនសង្ស័យបានជិះរថយម៉ាកកាមរីបាឡែន ១គ្រឿង បម្រុងបើករត់គេចខ្លួនត្រូវបានសមត្ថកិច្ចយករថយន្តរាំងពីមុខនិងខាងក្រោយហើយ ជនសង្ស័យក៏បានបើករថយន្តបុករថយន្តសមត្ថកិច្ច១គ្រឿងរាំងនៅខាងក្រោយបណ្តាលរថយន្តសមត្ថកិច្ចរងការខូចខាតយ៉ាងធ្ងន់ផងដែរ។ ជនសង្ស័យគ្រឿងញៀនមានឈ្មោះ មុត បូណា ហៅសុខ ភេទ ប្រុស អាយុ ៣៨ឆ្នាំ រស់នៅភូមិគោកឃ្មុំ ឃុំគោកឃ្មុំ ស្រុកបវេល ខេត្តបាត់ដំបង រងការចាប់ឃាត់ខ្លួនកាលពីវេលាម៉ោង១រសៀលថ្ងៃទី២៨ ខែវិច្ឆិកា ឆ្នាំ២០១៦ នៅលើផ្លូវសាធារណៈមួយកន្លែងក្នុងឃុំព្រៃខ្ពស់ ស្រុកបវេល ។ទន្ទឹមនោះសមត្ថកិច្ចឆែកឆេររកឃើញដកហូតបានបានថ្នាំញៀនមេតំហ្វេតាមីនទឹកកក ចំនួន៥កញ្ចប់ស្មើនិងទម្ងន់១០០ក្រាម ថ្នាំញៀនមេតំហ្វេតាមីនWY ២១៧គ្រាប់ ទូរស័ព្ទដៃ២គ្រឿង និងរថយន្តកាមរីបាឡែន១គ្រឿង។
បើតាមប្រភពព័ត៌មានពីកម្លាំងអាវុធហត្ថស្ថិតក្នុងការចុះបង្រ្កាបឃាត់ខ្លួនជនសង្ស័យ ប្រាប់ឱ្យដឹងថា កម្លាំងអាវុធហត្ថបង្រ្កាបឃាត់ខ្លួនជនសង្ស័យបានសម្រេច ក្រោយពីកម្លាំងអាវុធហត្ថ បានឃាត់ខ្លួនជនសង្ស័យប្រើប្រាស់ថ្នាំញៀន៤នាក់ ដែលជនសង្ស័យ៤នាក់នោះគេបានទៅទិញថ្នាំញៀនពីជនសង្ស័យឈ្មោះមុត បូណា ហៅសុខ នោះតែម្តង ។ ជនសង្ស័យ និងវត្ថុតាងគ្រឿងញៀន បន្ទាប់ពីកម្លាំងអាវុធហត្ថសាកសួរនិងកសាងសំណុំរឿងរួចរាល់ហើយ ។ ជនសង្ស័យនៅព្រឹក ថ្ងៃទី២៩ ខែវិច្ឆិកា ឆ្នាំ២០១៦ ត្រូវបានចាប់បញ្ជូនទៅកាន់តុលាការដើម្បីយកទៅចាត់ការតាមផ្លូវច្បាប់ ៕ សំ វិច្ឆិកា
