ទោះបីជាចាយលុយច្រើនទិញកីឡាករ ល្បីៗក្តីក៏ចិនកាត់បន្ថយកីឡាករបរទេសនៅលើទីលានដែរ

ខណៈដែលក្លិបធំៗនៅប្រទេសចិនកំពុងតែចំណាយលុយច្រើនសន្ធឹកសន្ធាប់ដើម្បីទិញ តារា បាល់ទាត់ល្បីៗរបស់ពិភពលោក នោះសហព័ន្ធបាល់ទាត់របស់ប្រទេសចិននឹងបង្កើតច្បាប់កាត់បន្ថយកីឡាករបរទេសពី៥នាក់មកត្រឹម៤នាក់ប៉ុណ្ណោះក្នុងការប្រកួតនៅក្នុងក្របខ័ណ្ឌអាជីពក្នុងស្រុក ។

សហព័ន្ធបាល់ទាត់របស់ប្រទេសចិនបានថ្លែងថា “ជាការពិតណាស់ថា កីឡា ករកម្រិតកំពូលរបស់ពិភពលោកបាននាំ មកនូវភាពសប្បាយរីករាយនិងការផុសផុលនៃវិស័យបាល់ទាត់នៅក្នុងប្រទេសចិនប៉ុន្តែវាក៏អាចបង្កឲ្យក្លិបមានបញ្ហាផ្នែកហរិញ្ញវត្ថុ និងកាត់បន្ថយឱកាសដល់កីឡាករក្នុងស្រុក បានលេងបាល់ទាត់។”

ដំណឹងនេះបានលេចឮតែ១សប្តាហ៍ ប៉ុណ្ណោះមុនពេលទីផ្សារទិញដូរកីឡាករនៅចិនបើកទ្វារហើយមួយថ្ងៃក្រោយពេលក្លិបShanghai SIPGបំបែកកំណត់ត្រានៅអាស៊ីទិញកីឡាករ Oscar ពីក្លិបតោខៀវ Chelsea ក្នុងតម្លៃខ្លួន៧០,៥លានអឺរ៉ូ ។

បច្ចុប្បនកីឡាករដែលមានតម្លៃខ្លួនថ្លៃជាងគេនៅប្រទេសចិនគឺកីឡាករ Hulk ដែលបានផ្លាស់ពី Zenit St Petersburg ក្នុង តម្លៃ៤៧លានផោន។ កីឡាករ Oscar ក៏នឹង ក្លាយទៅជាតារាបាល់ទាត់ល្បីមួយរូបក្នុង ចំណោមតារាបាល់ជាច្រើនទៀតដូចជា Didier Drogba, Ramires, Nicolas Anelka Graziano Pelle, Ezequiel Lavezzi, Jackson Martinez និងDemba Ba ដែល បានលេងនៅប្រទេសចិន៕