ជិះលឿនមិនប្រយ័ត្នបុកពេញទំហឹងពីក្រោយម៉ូតូមួយគ្រឿង របួសធ្ងន់ និងស្រាល២ម្នាក់

ភ្នំពេញ៖ បុរសម្នាក់បានជិះម៉ូតូក្នុងល្បឿងយ៉ាងលឿន ហើយមិនប្រយត្ន័បានជ្រុលចង្កូតទៅបុកម៉ូតូមួយទៀតដែលជិះស្របគ្នា បុកចំពីក្រោយពេញទំហឹង បណ្ដាលរងរបួសធ្ងន់ម្នាក់ស្រាលម្នាក់។ហេតុការណ៍គ្រោះថ្នាក់ចរាចរណ៌នេះបានកើតឡើងនៅវេលាម៉ោង០១និង១៥នាទី រំលងអាធ្រាតឈានចូលថ្ងៃទី១១ខែមករាឆ្នាំ២០១៧តាមបណ្ដោយផ្លូវ២៧១ត្រង់ចំណុចមុខខារ៉ាអូខេ ព្រះចន្ទពេញវង់ ស្ថិតក្នុងសង្កាត់ចាក់អង្រែលើ ខណ្ឌមានជ័យ ។

យោងតាមប្រភពព័ត៌មានពីកន្លែងកើងហេតុបានអោយដឹងថា នៅមុនពេលកើតហេតុគេឃើញបុរសម្នាក់ជិះម៉ូតូម៉ាកវីវ៉ាពណ៌ខ្មៅពាក់ស្លាកលេខកណ្ដាល1B.8065 ជិះម្នាក់ឯងទិសដៅពីលិចទៅកើតក្នុងល្បឿនមធ្យម ខណះមកដល់ចំណុចកើតហេតុខាងលើស្រាប់តែមានម៉ូតូមួយគ្រឿងទៀតម៉ាកហុងដាសេ១២៥ពណ៌ខ្មៅពាក់ស្លាកលេខភ្នំពេញ1CF.7413 ជិះម្នាក់ឯងដូចគ្នាបើកនៅក្នុងល្បឿនយ៉ាងលឿនទិសដៅស្របគ្នាមកបុកពីក្រោយពេញទំហឹងបណ្ដាលឲ្យដួលបោកនិងថ្នល់បាក់ធ្មេញហូរឈាមរងរបួសធ្ងន់ ហើយភ្លាមៗត្រូវបានរថយន្តសង្គ្រោះដឹកទៅព្យាបាលនៅមន្ទីរពេទ្យឯកជនហុងហាក់។ ចំណែកបុរសម្នាក់ទៀតម្ចាស់ម៉ូតូវីវ៉ារងរបួសស្រាលមិនបានទៅពេទ្យទេ ។

ក្រោយពេលកើតហេតុសមត្ថកិច្ចមូលដ្ឋានមកជួយអន្តរាគមន៌ធ្វើការវាស់វែងយកម៉ូតូទាំង២គ្រឿងទៅរក្សាទុកនៅអធិការខណ្ឌមានជ័យរងចាំដោះស្រាយនៅពេលក្រោយ ៕ ភារ៉ា ដង្កោ