សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ឆ្នាំង ៖ យុវជនម្នាក់បានរងរបួសធ្ងន់ធ្ងរ និង បានស្លាប់ពេលបញ្ជូនទៅដល់មន្ទីរពេទ្យខេត្ត បន្ទាប់ពីជនរងគ្រោះនោះបានជិះម៉ូតូទៅបុករថយន្តដែលកំពុងឈប់នៅអែបចិញ្ចើមផ្លូវ ។ ហេតុការណ៍នេះ បានកើតឡើងកាលពីវេលាម៉ោងប្រមាណជា៦ល្ងាច ថ្ងៃទី២១ ខែមករា ឆ្នាំ២០១៧ ស្ថិតនៅសង្កាត់ខ្សាម ក្រុងកំពង់ឆ្នាំង ខេត្កកំពង់ឆ្នាំង ។
សមត្ថកិច្ចបានអោយដឹងថា ជនរងគ្រោះមានឈ្មោះ ហ៊ាន ប៊ុនធឿន ភេទប្រុស អាយុ២០ឆ្នាំ រស់នៅភូមិស្វាយជ្រុំថ្មី ឃុំស្វាយជ្រុំ ស្រុករលាប្អៀរ ខេត្តកំពង់ឆ្នាំង ជិះម៉ូតូម៉ាកហុងដា គុបជ្រុងពណ៌ទឹកប្រាក់ ។
សមត្ថកិច្ចបានអោយដឹងទៀតថា នៅមុនពេលកើតហេតុមានរថយន្តដឹកទំនិញមួយគ្រឿងពាក់ស្លាកលេខភ្នំពេញ៣C-៥៥០២ ខូចឈប់ជួសជុលនៅនឹងមួយកន្លែង ស្រាប់តែនៅពេលកើតហេតុ ជនរងគ្រោះបានជិះម៉ូតូម្នាក់ឯង ក្នុងទិសដៅពីត្បូងទៅជើងបោះពួយយ៉ាងខ្លាំង នៅពេលមដល់ចំណុចកើតហេតុជនរងគ្រោះបានជិះម៉ូតូបុកគូថរថយន្តដឹកទំនិញ ពីក្រោយពេញមួយទំហឹងតែម្តង បណ្តាលអោយជនរងគ្រោះរងរបួសជាទម្ងន់ ឈាមហូរយ៉ាងខ្លាំង ក្រោយពេលកើតហេតុជនរងគ្រោះបានដឹកយកទៅសង្រ្គោះនៅមន្ទីរពេទ្យបង្អែកខេត្តកំពង់ឆ្នាំង ដោយសារស្ថានភាពធ្ងន់ធ្ងរពេក ជនរងគ្រោះបានស្លាប់ភ្លាមៗនៅក្នុងមន្ទីរពេទ្យតែម្តង ក្រុមគ្រួសារជនបានយកសពជនរងគ្រោះទៅធ្វើបុណ្យនៅស្រុកកំណើតផងដែរ ៕ ចន្ថា
