ចោរឆក់កាបូបម្នាក់ក្នុងចំណោមបក្ខពួក៤នាក់ ត្រូវសមត្ថកិច្ចចាប់ខ្លួន

ភ្នំពេញ៖ កំលាំងល្បាតរបស់នគរបាលប៉ុស្តិ៍ស្តិរដ្ឋបាលបឹងកក់ ទី២ ខណ្ឌទួលគោក បានឃាត់ខ្លួនជនសង្ស័យ ០១នាក់ ជាក់ស្តែង ពីបទលួចមានស្ថានទម្ងន់ទោស ដោយសារ ការប្រើអំពើហិង្សា ( ឆក់កាបូបបណ្តាលឱ្យជនរង គ្រោះដួលម៉ូតូរងរបួស ) ប្រព្រឹត្តនៅនៅថ្ងៃទី៣១ ខែមករា ឆ្នាំ២០១៧ វេលាម៉ោង ៨និង១៥នាទីព្រឹក ចំណុចផ្លូវលេខ ៥៦៦ កែងផ្លូវលេខ៣១៣ ក្រុមទី៣០ ភូមិ៧ សង្កាត់បឹង កក់ទី២ ខណ្ឌទួលគោក រាជធានីភ្នំពេញ ។

ជនសង្ស័យឈ្មោះ ផាន សុភារិទ្ធ ហៅ រិទ្ធ ភេទ ប្រុស អាយុ ១៨ឆ្នាំ ជនជាតិខ្មែរ មុខរបរ ពុំពិតប្រាកដ ស្នាក់នៅផ្ទពុំចាំលេខ ផ្លូវលេខ៥៩៨ ភូមិទំនប់ សង្កាត់ ភ្នំពេញថ្មី ខណ្ឌសែនសុខ រាជធានីភ្នំពេញ ។ ជនរងគ្រោះឈ្មោះ ជឹម សំណាង ភេទស្រី អាយុ ៣៣ឆ្នាំ ជនជាតិខ្មែរ មុខរបរ បុគ្ឋលិកអង្គការNew Funding Model ស្នាក់នៅផ្ទះលេខ២៦៨ ផ្លូវលេខ ៥៩៨ សង្កាត់ទឹកថ្លា ខណ្ឌសែនសុខ រាជធានីភ្នំពេញ ។

ចំណែកឯវត្ថុតាងដែលបានចាប់យក ៖ កាបូនស្ពាយពណ៌ខ្មៅ មួយ ម៉ាក Michealkors ដែលក្នុងនោះមានកូនកាបូប ពណ៌ស ម៉ាកChanel ,ប្រាក់រៀលចំនួន ៤០៥០០០៛ , ទូរស័ព្ទមួយគ្រឿងម៉ាក Nokia 105 ពណ៌ខៀវ មាន ស៊ីមលេខ089 708957 , ប័ណ្ណសម្គាស់ម៉ូតូ ០១ សន្លឹក , អត្តសញ្ញាណប័ណ្ណខ្មែរ ០១សន្លឹក និងកាត ATM ធនាគារអេស៊ីលីដា ០១សន្លឹក ( បានប្រគល់ឱ្យ ជនរងគ្រោះវិញ ) ។

តាមប្រភពព័ត៌មានពីមន្រ្តីនគរបាលខណ្ឌទួលគោក បានឲ្យដឹងថា នៅថ្ងៃទី៣១ ខែមករា ឆ្នាំ២០១៧ វេលាម៉ោងប្រហែល ៨និង១៥នាទី ព្រឹកជនរងគ្រោះជិះម៉ូតូ ម៉ាក Suzuki Smash ពណ៌ក្រហម-ខ្មៅ ពាក់ស្លាក លេខកណ្តាល 1I-2320 មកដល់ចំណុចកើតហេតុ ស្រាប់តែមានជនសង្ស័យ០៤នាក់ ជិះម៉ូតូម៉ាក Honda C125 ពណ៌ខ្មៅ ស៊េរី2017 ពីរគ្រឿង បានតាមជន រងគ្រោះពីក្រោយក្នុងទិសដៅស្របគ្នាពីលិចទៅកើត ហើយបានអែបទន្ទឹមខាងឆ្វេង ធ្វើសកម្មភាពឆក់យក កាបូបដែលជនរងគ្រោះកំពុងស្ពាយបានសម្រេច បណ្តាលឱ្យជនរងគ្រោះដួលម៉ូតូរងរបួសបាតដៃទាំង សង ចំណែកម៉ូតូរបស់ជនសង្ស័យបានដួលដែរ ភ្លាម នោះមានការអន្តរាគមន៍ពីសមត្ថកិច្ចឃាត់ខ្លួនបានជន សង្ស័យ០១នាក់ និងយកកាបូបជនរងគ្រោះបានមកវិញ ចំណែកជនសង្ស័យ០៣នាក់ បានជិះម៉ូតូគេចខ្លួនបាត់ ។

បច្ចុប្បន្នជនសង្ស័យ កំពុងឃាត់ខ្លួនជាបណ្តោះអាសន្ន នៅអធិការដ្ឋាននគរបាលខណ្ឌទួលគោក ដើម្បីសាក សួរ និងកសាងសំណុំរឿងបញ្ជូនទៅសាលាដំបូងរាជ ធានីភ្នំពេញ ចាត់ការតាមផ្លូវច្បាប់ ៕ ស តារា