សារព័ត៌មាន នគរវត្ត តែងតែនាំមុខគេជានិច្ច
ខេត្តពោធិ៍សាត់៖ កំលាំងការិយាល័យប្រឆាំង បទល្មើសគ្រឿងញៀន នៃស្នងការដ្ឋាននគរបាល ស្រុកក្រគរ ប៉ុស្តិ៍រដ្ឋបាលស្វាយស សហការគ្នាបង្រ្កាបការជួញដូរដោយខុសច្បាប់នូវសារធាតុញៀន ក្នុងនោះកម្លាំងឃាត់ខ្លួនមុខសញ្ញាបានម្នាក់រួមទាំងឧបករណ៍ប្រើប្រាស់ខ្លះៗ និងសម្ភារផងដែរ ពិសេសកាំបិតសាំងគីមចំនួន ០២ថែមទៀត។
ប្រតិបត្តិការនេះធ្វើឡើងនៅវេលាម៉ោង ១៤ និង០០នាទី ថ្ងៃទី០១ ខែកុម្ភៈ ឆ្នាំ២០១៧ ស្ថិតក្នុងភូមិកំរ៉ែង ឃុំស្វាយស ស្រុកក្រគរ ខេត្តពោធិ៍សាត់។
កំលាំងចុះប្រតិបត្តិការខាងលើប្រាប់ថាក្នុងកិច្ចសហការគ្នាបង្រ្កាបនេះ ធ្វើការឃាត់ខ្លួនជនសង្ស័យជាមុខសញ្ញាជួញដូរដោយខុសច្បាប់នូវសារធាតុញៀនម្នាក់ឈ្មោះ គង់ សេរីឈុន ហៅលន់ ភេទប្រុស អាយុ ៤៧ឆ្នាំ បច្ចុប្បន្នរស់នៅភូមិ-ឃុំកើតហេតុខាងលើ។
ប្រភពព័ត៌មានពីកំលាំងខាងលើបន្តថា ក្នុងការឃាត់ខ្លួន ជនសង្ស័យជាមុខសញ្ញាគេរកមិនឃើញនូវវត្ថុតាងនោះទេ គ្រាន់តែរកឃើញនៅឧបករណ៍ប្រើប្រាសគ្រឿងញៀនខ្លះៗ និងឆែកឆេររកឃើញការប្រើប្រាស់កាំបិតសាំងគីមចំនួន ០២ខុសច្បាប់។
ប្រភពខាងលើដដែលនេះ បន្តទៀតថា ជនសង្ស័យជា សញ្ញាជំនាញបានធ្វើតេស្តទឹកនោម ឃើញមានផ្ទុកនៅសារធាតុញៀន ដូច្នេះកម្លាំងបំពេញនីតិវិធីបញ្ជូនខ្លួនជនសង្ស័យរួមទាំងវត្ថុតាង ទៅសាលាដំបូងខេត្តពោធិ៍សាត់ ដើម្បីអនុវត្តន៍បន្តនារសៀលថ្ងៃទី២ ខែកុម្ភៈ ឆ្នាំ២០១៧ ៕ បឹុម ពិន
