សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បន្ទាប់ពីប្រឡូកជាមួយវិស័យសិល្បៈប្រមាណ៣ឆ្នាំ តារាសម្តែងស្រីសាច់ខ្ចីកញ្ញា សូលីហ្សា អាចប្រមូលការងារក្នុងពិភពសិល្បៈបន្តបន្ទាប់គ្នាជាពិសេសនាងអាចគ្រងតំណែងជាតួអង្គសំខាន់ៗ បានជាច្រើនរួចមកហើយ។ ក្រៅពីជោគជ័យការងារសិល្បៈ តារាស្រីរូបនេះ ក៏ត្រូវបានគេទម្លាយថាមានបុរសៗចោមស្នេហ៍ជាច្រើនដែរ រហូតមានបុរសមានទ្រព្យមួយចំនួនហ៊ានទិញរបស់ទ្រព្យថ្ពក់ចិត្តនាងផងដែរ ។
តារាសម្តែងមានរូបរាងខ្ពស់សម្រស់បាន សូលីហ្សា កាន់តែលេចមុខច្រើនក្នុងការងារសិល្បៈដែលជាក្តីរំពឹងមួយក្នុងឱកាសចាប់យកតារាលេចធ្លោជាមួយនឹងសមិទ្ធផលការងារជាច្រើនបន្តបន្ទាប់ ។ ក្រៅពីចាប់កិច្ចការជាតារាបង្ហាញម៉ូដ ក្នុងក្រុមល្បីមួយ នឹងជាតារាសម្តែងទាំងភាពយន្ត និងកាយវិការខារ៉ាអូខេ ដោយនាងកំពុងតែមមាញឹកជារៀងរាល់ថ្ងៃ ។ ថ្លែងបញ្ជាក់គ្រាដែលចេញទៅសម្តែងឲ្យផលិតកម្មសាន់ដេ តារាស្រីរូបនេះបញ្ជាក់ថា ក្នុងរយៈពេលចុងក្រោយនេះ នាងសម្តែងជាតួឯក និងតួរងជាច្រើនរឿងដែលនាងជឿជាក់ថា នឹងកាន់តែលេចមុខមាត់ខ្លាំងក្នុងកិច្ចការសិល្បៈ។ តារាសម្តែងស្រីវ័យ២០ឆ្នាំរូបនេះបានបញ្ជាក់ថា ទោះរឿងការងារសិល្បៈហាក់ហក់ឡើងខ្លាំងជាងមុនបន្តិចមែន ប៉ុន្តែរឿងរ៉ាវស្នេហានាងមិនទាន់គិតគូរនៅឡើយទេ ព្រោះ នៅវ័យក្មេងចង់បន្តសាងឈ្មោះក្នុងអាជីពសិល្បៈបន្តិចសិន។ នាងទទួលស្គាល់ថា កន្លងមកពិតជាមានបុរសមួយចំនួនតាមស្រឡាញ់នាងមែន ប៉ុន្តែនាងហាក់មិនចាប់អារម្មណ៍ បើទោះបីជាមានបុរសជាច្រើនព្យាយាមនិយាយលួងលោម និងថ្ពក់ចិត្តនាងតាមរយៈការសន្យាផ្តល់លុយផ្តល់ឡានឲ្យក៏ដោយ ។ នាងបន្តថា បុរសខ្លះបានសន្យាប្រគល់ទាំងរថយន្តទំនើប :Lexus 570 ថ្មីសន្លាងឲ្យនាងដែរ ប៉ុន្តែនាងមិនព្រម ព្រោះតែនាងយល់ថា ការប្រគល់កាដូណាមួយសុទ្ធតែមានបំណងអ្វីត្រឡប់ទៅវិញ ។
នាងថា បើសិនជាបុរសនោះស្រឡាញ់នាងពិតប្រាកដមែន គឺប្រាកដជាចូលស្តីដណ្តឹងនាងតាមប្រពៃណីជាក់ជាមិនខាន។
ក្រោយមានឈ្មោះល្បី និងធំពេញរូបរាង សូ លីហ្សា មិនមានវត្តមានម្តាយតាមស្អិតដូចគ្រាមុនទេ ប៉ុន្តែក៏មិនមានបុរសណាអាចតាមស្នេហ៍នាងបាននៅឡើយ។ លីហ្សា បញ្ជាក់ថា ម្តាយនាងរវល់នឹងការងារសម្តែង និងមុខរបរខ្លះដែលមិនមានពេលគ្រប់គ្រាន់តាមនាងគ្រប់ជំហ៊ានដូចមុនឡើយ ហើយនាងក៏មានទំនុកចិត្តចំពោះខ្លួនឯងដែរថា នឹងអាចមើលការខុសត្រូវខ្លួនឯងបាន៕ វឌ្ឍនា
