សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ នគរបាលខណ្ឌឫស្សីកែវ សហការជាមួយកម្លាំងប៉ុស្តិ៍គីឡូម៉ែត្រលេខ៦បានចុះបង្ក្រាបទីតាំងជួញដូរ និងចែកចាយគ្រឿងញៀន មួយកន្លែង ដោយឃាត់ខ្លួនជនសង្ស័យ ៣នាក់ និងដកហូតថ្នាំញៀន ៧កញ្ចប់ធំ កាលពីវេលាម៉ោង១១និង៣០នាទីព្រឹក ថ្ងៃទី០៣ ខែឧសភា ឆ្នាំ២០១៧ នៅចំណុចផ្ទះគ្មានលេខ តាមបណ្តោយផ្លូវរថភ្លើង ក្រុមទី១៣ ភូមិស្ពានខ្ពស់ សង្កាត់គីឡូម៉ែត្រលេខ៦ ខណ្ឌឫស្សីកែវ ។
សមត្ថកិច្ចបានឲ្យដឹងថា នៅក្នុងកិច្ចប្រតិបត្តិការនេះ គឺកម្លាំងសមត្ថកិច្ចយើងបានធ្វើការស្រាវជ្រាវរហូតឈានដល់ការបើកប្រតិបត្តិការចុះបង្ក្រាបជាក់ស្តែង នៅទីតាំងខាងលើនេះ ដោយបានឃាត់ខ្លួនជនសង្ស័យ៣នាក់ ព្រមទាំងដកហូតម្សៅក្រាមពណ៌សថ្លា ចំនួន ៧កញ្ចប់ធំ ថង់ប្លាស្ទឹក សម្រាប់ច្រកគ្រឿងញៀនមួយចំនួន, ដាវកែច្នៃចំនួន មួយជញ្ជីងសម្រាប់ថ្លឹងគ្រឿងញៀនចំនួនមួយ និងឧបករណ៍ប្រើប្រាស់មួយចំនួន។
សមត្ថកិច្ចបានបន្តទៀតថា ជនសង្ស័យទាំង ៣នាក់ខាងលើ ទី១-ឈ្មោះ ស ចាន់ ភេទប្រុស អាយុ ២៧ឆ្នាំ មុខរបរ មិនពិតប្រាកដ(ជួញដូរ)មានទីលំនៅផ្ទះជួលគ្មានលេខ ផ្លូវលំ ក្រុម១០ ភូមិមិត្តភាព សង្កាត់ឫស្សីកែវ, ទី២-ឈ្មោះ ម៉ុន ប្រុសពៅ ភេទប្រុស អាយុ ២៣ឆ្នាំ មុខរបរ កម្មករ (ប្រើប្រាស់) និងទី៣-ឈ្មោះ ម៉ុន ផ្កាយព្រឹក ភេទប្រុស អាយុ ១៩ឆ្នាំ មុខរបរ កម្មករ (ប្រើប្រាស់) បច្ចុប្បន្នអ្នកទាំង ២នាក់ មានទីលំនៅផ្ទះគ្មានលេខ ផ្លូវរថភ្លើង ក្រុមទី១៣ភូមិស្ពានខ្ពស់សង្កាត់គីឡូម៉ែត្រលេខ៦ ខណ្ឌឫស្សីកែវ។
ក្រោយពីឃាត់ខ្លួនជនសង្ស័យទាំង៣នាក់ ព្រមនឹងវត្ថុតាងត្រូវសមត្ថកិច្ចបញ្ជូនទៅកាន់អធិការដ្ឋាននគរបាលខណ្ឌឫស្សីកែវ ដើម្បីកសាងសំណុំរឿង បញ្ជូនទៅកាន់សាលាដំបូងរាជធានីភ្នំពេញចាត់ការតាមនីតិវិធី៕ អារុណរះ
