សារព័ត៌មាន នគរវត្ត តែងតែនាំមុខគេជានិច្ច
ប្រទេសថៃ៖ ពលករខ្មែរនៅប្រទេសថៃ៤នាក់ទៀតហើយ បានស្លាប់ភ្លាមៗនៅនឹងកន្លែងកើតហេតុ និង៣នាក់ទៀតរងរបួស ខណៈដែលពួកគេបាននាំគ្នា ជិះរថយន្តតាក់ស៊ី ចូលទៅកាន់ទីក្រុងបាងកក ដើម្បីរកការងារធ្វើ ក៏បានជួបឧប្បទ្ទវហេតុនៅតាមដងផ្លូវ ដោយបុកជាមួយរថយន្តធន់ធំមួយគ្រឿង ធ្វើដំណើរស្របទិសគ្នា នៅថ្ងៃទី១៧ ខែឧសភា ឆ្នាំ២០១៧ លើកំណាត់ផ្លូវលេខ៣៣១ ត្រង់ចន្លោះបង្គោលគីឡូម៉ែត្រលេខ១២១ និង១២២ ស្ថិតនៅត្រង់ចំណុចណងអ៊ីថូន ភូមិ១៤ ឃុំកោះខ្នុរ ស្រុកភ្នំសារៈខាម ខេត្តឆាក់ឈើងសៅ ប្រទេសថៃ ។
ក្រោយកើតហេតុភ្លាមៗ កម្លាំងតម្រួតថៃ បានចុះទៅត្រួតពិនិត្យនៅកន្លែងកើតហេតុ គឺមានរថយន្តមួយគ្រឿងម៉ាកនីសាន់ណាវ៉ារ៉ា ពណ៌ខ្មៅ បានបើកទៅបុកពីក្រោយរថយន្តធុនធ្ងនម៉ាក ហ៊ីណូ ប្រភេទយីឌុប សណ្តោងរ៉ឺម៉កពាក់ស្លាកលេខ 70.0980 និង70.3116 ដោយរថយន្តនីសាន់ ស្ថិតក្នុងសភាព ខ្ទេចខ្ទី ព្រមទាំងមានមនុស្សស្លាប់ និងរបួសជាច្រើននាក់ផងដែរ ដោយនៅពេលនោះមេឃក៏កំពុង ធ្លាក់ភ្លៀងយ៉ាងខ្លាំង។
អ្នកដំណើរដែលស្លាប់ គេនៅមិនទាន់ស្គាល់អត្តសញ្ញាណនៅឡើយដោយគ្រាន់តែដឹងថា អ្នករបួសមានឈ្មោះ នីត ភេទស្រី អាយុ៣៤ឆ្នាំ, ឈ្មោះ ខេង ភេទប្រុស អាយុ២២ឆ្នាំ និងកុមារម្នាក់អាយុ២ឆ្នាំ ចំណែកអ្នកបើកបរដែលស្លាប់ដែរនោះមានឈ្មោះ ផុងផាត់ មេតអាំផន អាយុ២៨ឆ្នាំ ជាជនជាតិថៃ រស់នៅ ស្រុកបាងប៉ាក់កុង ខេត្តឆាក់ឈើងសៅ។
ប្រភពពីលោក ជីរ៉ាក់វ៉ាត់ ភូក្រងថង អាយុ៣៩ឆ្នាំ អ្នកបើកបររថយន្តធំ បានរៀបរាប់ថា ខណៈដែលខ្លួនកំពុងបើកបរ ដល់ត្រង់ចំណុចកើតហេតុគាប់ជួន មេឃក៏កំពុងធ្លាក់ភ្លៀងយ៉ាងខ្លាំងផងនោះ ស្រាប់តែឮសម្លេងអ្វីម៉្យាងមកបុកពីក្រោយ ពេលខ្លួនចុះទៅមើលក៏ស្រាប់តែឃើញសភាពបែបនេះ ខ្លួនក៏ប្រញ៉ាប់ទូរស័ព្ទ ទៅប្រាប់សមត្ថកិច្ចឲ្យចុះមកត្រួតពិនិត្យធ្វើកោសល្យវិច័យ ។
សពកំពុងស្រាវជ្រាវរកសាច់ញាតិ ដើម្បីទាក់ទងទៅអគ្គកុងស៊ុល និងបញ្ជូនមកស្រុកកំណើតផងដែរ ៕ វណ្ណា
