ស្ត្រីម្នាក់ដួលបោកក្បាលនឹងថ្នល់សន្លប់ ដោយសារចោរឆក់កាបូបបានសម្រេច

ភ្នំពេញៈ ស្ត្រីម្នាក់រងរបួសសន្លប់ស្តូកស្តឹងនៅកន្លែងកើតហេតុ ខណៈជិះម៉ូតូតាមផ្លូវសំដៅទៅ ផ្ទះហើយ ត្រូវក្រុមចោរឆក់ជិះម៉ូតូដេញតាមពីក្រោយឆក់កាបូបបានសម្រេចបណ្តាលឲ្យដួល ម៉ូតូ។

ហេតុការណ៍នេះកើតឡើង កាលពីវេលាម៉ោង១០និង៣០នាទីយប់ ថ្ងៃទី២៧ ខែមិថុនា ឆ្នាំ២០១៧ នៅតាមបណ្តោយមហាវិថីសហព័ន្ធរុស្សី ស្ថិតក្នុងសង្កាត់ទឹកថ្លា ខណ្ឌសែនសុខ រាជធានីភ្នំពេញ។

សាក្សីបានឲ្យដឹងថា មុនពេលកើតហេតុ គេបានឃើញ ស្រ្តីរងគ្រោះមិនស្គាល់ឈ្មោះម្នាក់មានវ័យជាង២០ឆ្នាំ បានជិះម៉ូតូមួយគ្រឿងម៉ាកហុងដាឃ្លីច ពណ៌ស ពាក់ស្លាកលេខសៀមរាប 1H-0006 ធ្វើដំណើរតែម្នាក់ឯង តាមបណ្តោយមហាវិថីសហព័ន្ធរុស្ស៊ី ក្នុងទិសដៅពីកើតមកលិច។ លុះមកដល់កន្លែងកើតហេតុ ម្តុំខាងលិចផ្សារទឹកថ្លា ស្រាប់តែមានក្រុមជនសង្ស័យជាចោរឆក់ពីរនាក់ជិះម៉ូតូមិនស្គាល់ម៉ាកនិងស្លាកលេខមួយគ្រឿងដេញតាមស្រ្តីរងគ្រោះពីក្រោយ យ៉ាងលឿនហើយពេលជិះម៉ូតូមកដល់ជិតស្រ្តីរងគ្រោះក៏ បានធ្វើសកម្មភាពឆក់កាបូបពីស្រ្តីរងគ្រោះដែលស្ពាយលើស្មា បណ្តាលឲ្យស្រ្តីរងគ្រោះ ដួលបោកក្បាលនឹងថ្នល់ សន្លប់ស្តូកស្តឹងនៅកន្លែងកើតហេតុ ហើយត្រូវបានគេទូរស័ព្ទហៅរថយន្តសាមុយដឹកបញ្ចូនទៅមន្ទីរពេទ្យធ្វើការសង្រ្គោះជាបន្ទាន់។ចំណែកក្រុមចោរឆក់ទាំងពីរនាក់បានជិះម៉ូតូរត់គេចខ្លួនដោយសុវត្ថិភាពដោយយកទាំងកាបូបរបស់ស្រី្តរងគ្រោះទៅជាមួយផង ដែលគេមិនដឹងថា ក្នុងកាបូបនោះមានអ្វីខ្លះនោះទេ ព្រោះស្រ្តីរងគ្រោះសន្លប់មិនអាចអធិប្បាយប្រាប់បាន ។

ក្រោយពេលកើតហេតុម៉ូតូស្រ្តីរងគ្រោះ ត្រូវបានសមត្ថកិច្ចយកទៅរក្សាទុកនៅប៉ុស្តិ៍នគរបាលរដ្ឋបាលទឹកថ្លា ដើម្បីរង់ចាំក្រុមគ្រួសារស្រ្តីរងគ្រោះមកទទួលយកទៅប្រើប្រាស់វិញ៕ប្រាថ្នា