សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្តាលៈ ជនសង្ស័យម្នាក់ ត្រូវបានសមត្ថកិច្ចនគរបាលប៉ុស្តិ៍រដ្ឋបាលក្រាំងយ៉ូវបង្រ្កាបចាប់ខ្លួន កាលពីវេលារសៀល ថ្ងៃទី៤ ខែកក្កដា ឆ្នាំ២០១៧ នៅភូមិរកា ឃុំក្រាំងយ៉ូវ ស្រុកស្អាង បន្ទាប់ពីជនសង្ស័យរូបនេះធ្វើសកម្មភាពលួចដោះអាគុយចេញពីគ្រឿងចក្របម្រុងយកទៅលក់ ។
មន្ត្រីនគរបាលស្រុកស្អាងបានឲ្យដឹងថា ជនសង្ស័យឈ្មោះ កែន ស្រឿន ហៅកុយ ភេទប្រុស អាយុ២២ឆ្នាំ ជនជាតិខ្មែរ មុខរបរ មិនពិតប្រាកដ មានទីលំនៅភូមិរកា ឃុំក្រាំងយ៉ូវ ស្រុកស្អាង ។ ចំណែកឯជនរងគ្រោះជាម្ចាស់គ្រឿងចក្រឈ្មោះ ជា ហ៊ាង ភេទប្រុស អាយុ៤៨ឆ្នាំ ជនជាតិខ្មែរ មុខរបរ អាជីវករ មានទីលំនៅភូមិថ្មី២ សង្កាត់តាខ្មៅ ក្រុងតាខ្មៅ ខេត្តកណ្តាល ។ ក្នុងប្រតិបត្តិការបង្រ្កាបចាប់ខ្លួនជនសង្ស័យខាងលើនេះ សមត្ថកិច្ចបានធ្វើការដកហូតវត្ថុតាងរួមមាន៖ អាគុយចំនួន០២គ្រាប់ កម្លាំង៧០អំពែរ និងកេះដាក់កូនសោរចំនួន០១ផងដែរ ។
ប្រភពដដែលបានបន្តថា នៅមុនពេលកើតហេតុជនរងគ្រោះបានឲ្យតៃកុងបើកគ្រឿងចក្រទៅទុកនៅភូមិរកា ឃុំក្រាំងយ៉ូវ ស្រុកស្អាង ដើម្បីស៊ីឈ្នួលធ្វើផ្លូវនៅក្នុងភូមិ ។ នៅយប់ថ្ងៃទី០២ ខែកក្កដា ឆ្នាំ២០១៧ ជនរងគ្រោះបានឲ្យតៃកុងគ្រឿងចក្រចំនួន២នាក់ដេកយាម លុះព្រឹកឡើងទើបតៃកុងដឹងថាបាត់អាគុយ និងកេះដាក់កូនសោរ ។ តៃកុងគ្រឿងចក្រក៏បានទូរស័ព្ទប្រាប់ជនរងគ្រោះជាម្ចាស់គ្រៀងចក្រ បន្ទាប់ពីទទួលដំណឹងនេះភ្លាមជនរងគ្រោះក៏បានប្រញាប់ទៅដាក់ពាក្យបណ្តឹងនៅសមត្ថកិច្ចនករបាលប៉ុស្តិ៍ ។ សមត្ថកិច្ចនគរបាលប៉ុស្តិ៍បានចុះធ្វើការស្រាវជ្រាវ រហូតឈានដល់បង្រ្កាបចាប់ខ្លួនជនសង្ស័យ រួមជាមួយវត្ថុតាង ដើម្បីចាត់ការតាមច្បាប់ ៕ ស្អាងជ័យ
