សារព័ត៌មាន នគរវត្ត តែងតែនាំមុខគេជានិច្ច
ខេត្តសៀមរាប៖ ក្លិបកីឡាបាញ់ធ្នូ ភូមិន្ទកម្ពុជា បានគាស់កកាយ ចូលក្នុងបេតិកភណ្ឌធ្នូខ្មែរ និងកំពុងទាក់ទាញភ្ញៀវទេសចរណ៍ជាតិនិងអន្ដរជាតិឱ្យ មានចំណាប់អារម្មណ៍ ស្វែងយល់អំពីប្រភេទធ្នូបុរាណខ្មែរ និងបាញ់សាកល្បងកំសាន្តរយៈពេល ៩០នាទីយ៉ាងសប្បាយរីករាយ។ ក្លឹបកីឡាបាញ់ធ្នូ ភូមិន្ទកម្ពុជា ជាជម្រុកនៃកន្លែងកម្សាន្ដរបស់ភ្ញៀវទេសចរណ៍គ្រប់ជាតិសាសន៍ ក្រៅពីដើរទស្សនាប្រាង្គប្រាសាទអាច ធ្វើឱ្យភ្ញៀវទេសចរណ៍មានជម្រើសជាច្រើនទៀតសម្រាប់ដំណើរការកម្សាន្ដរបស់ពួកគាត់។ ក្លឹបកីឡាបាញ់ធ្នូភូមិន្ទកម្ពុជា មានទីតាំងស្ថិតនៅភូមិសាលាកន្សែង សង្កាត់ស្វាយដង្គំ ក្រុងសៀមរាប ។
លោក សា ឌីណា ប្រធានក្លឹបកីឡាបាញ់ធ្នូភូមិន្ទកម្ពុជា បានឱ្យដឹងថា ក្លឹបរបស់លោកបានបង្កើតឡើងកាលពីថ្ងៃទី០៧ ខែតុលា ឆ្នាំ២០១៦ ដោយមានសមាជិកចំនួន ១០រូប ក្លឹបនេះមានគោលដៅបណ្ដុះបណ្ដាលធនធានកីឡាករបាញ់ធ្នូ ដើម្បីត្រៀមចូលរួមប្រកួតប្រជែងក្នុងព្រឹត្តិការណ៍កីឡាថ្នាក់ជាតិ និងព្រឹត្តិការណ៍ស៊ីហ្គេមឆ្នាំ២០២៣ ដែលកម្ពុជានឹងរៀបចំធ្វើជាម្ចាស់ផ្ទះ។ ជាមួយគ្នានេះដែរក្លឹបក៏មានគោលដៅក្នុងការគាស់កកាយឡើងវិញនូវបេតិកភ័ណ្ឌធ្នូបុរាណខ្មែរ ដែលបានបាត់បង់អស់រយៈកាលជាយូរឆ្នាំមកហើយផងដែរ។
លោក ទិល ចាន់លីន អ្នកឯកទេសស្រាវជ្រាវធ្នូបុរាណខ្មែរ និងជាសមាជិកក្លឹបកីឡាបាញ់ធ្នូភូមិន្ទកម្ពុជាបានឱ្យដឹងថា លោកមានបំណងចង់ឱ្យមហាជនស្គាល់ពីប្រភេទធ្នូបុរាណខ្មែរបានទូលំទូលាយ។បើ តាមរយៈការស្រាវជ្រាវរយៈពេល ៧ឆ្នាំកន្លងមកនេះ លោកបានរកឃើញ និងផលិតធ្នូបុរាណបានចំនួន ២៥ និងជំហរបាញ់ធ្នូប្រមាណ៣០ជំហរ ការស្រាវជ្រាវផ្ដោតសំខាន់ទៅលើការសាកសួរចាស់ៗតាមបណ្ដាខេត្តដែលលោក មានលទ្ធភាពទៅដល់ ការស្រាវជ្រាវតាមវចនានុក្រម តាមសារៈមន្ទីរ និងតាមជញ្ជាំងប្រាសាទ។
លោកបានបន្តទៀតថា រូបចម្លាក់នៅលើជញ្ជាំងប្រាសាទអង្គរបានផ្ដល់តម្រុយជាច្រើនដល់ការស្រាវជ្រាវរបស់លោកបើប្រៀបធៀបរវាងធ្នូបុរាណនិងធ្នូសម័យ វាមានភាពខុសគ្នាតាំងពីវត្ថុធាតុដើមក្នុងការផលិត និងការប្រើប្រាស់។ការផលិតធ្នូបុរាណមួយ យើងត្រូវចំណាយពេលប្រមាណ១ខែ ហើយត្រូវធ្វើដោយផ្ចិតផ្ចង់ងឆ្លងតាមដំណាក់កាលនីមួយៗរហូតដល់ទៅ ៨ដំណាក់កាលឯណោះ ធ្នូបុរាណខ្មែរអាចបាញ់បានចម្ងាយប្រមាណ ២០០ម៉ែត្រ ខណៈធ្នូសម័យបាញ់មិនដល់នោះឡើយ។
ទន្ទឹមនឹងការផ្ដល់ជាទីតាំងសម្រាប់ភ្ញៀវទេសចរណ៍បាញ់ធ្នូទាំងប្រភេទបុរាណ និងសម័យ ក្លឹបកីឡាបាញ់ធ្នូភូមិន្ទកម្ពុជាកំពុងតែបណ្ដុះបណ្ដាលកីឡាករបាញ់ធ្នូសម័យចំនួន ៤រូប ក្លឹបគ្រោងនឹងជ្រើសរើសយុវជន ជាពិសេសកុមារា កុមារី មានជីវភាពក្រីក្ររចំនួន២០នាក់ដើម្បីបណ្ដុះបណ្ដាលបន្ថែមទៀត ៕ ប៊ុន រិទ្ធី
