សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ បុរសម្នាក់បានរងរបួសធ្ងន់ ខណៈដែលបើករថយន្តដឹកអេតចាយ បុកគ្នាជាមួយរថយន្តកុងតឺន័របញ្ច្រាសគ្នា ធ្លាក់ចូលវាលស្រែភ្ញាក់ផ្អើលកាលពីវេលាម៉ោង៧ និង២០នាទីព្រលប់ ថ្ងៃទី២៧ ខែកក្កដា ឆ្នាំ២០១៧ នៅលើផ្លូវជាតិលេខ១ ស្ថិតក្នុងភូមិគោកក្តោល ឃុំក្រោលគោ ស្រុកស្វាយជ្រំ ខេត្តស្វាយរៀងសង្ស័យប្រើប្រាស់ល្បឿនលឿន។
នគរបាលស្រុកបានឲ្យដឹងថា ជនរងរបួសធ្ងន់មានឈ្មោះ ឆាំ ភារុណ ភេទប្រុស អាយុ១៩ឆ្នាំ ស្រុកកំណើតភូមិចំបក់ថ្ម ឃុំសូរ្យសែន ស្រុក ព្រៃឈរ ខេត្តកំពង់ចាម ខណៈបើករថយន្តដឹកអេយចាយមួយគ្រឿង ពណ៌ខៀវ ពាក់ស្លាក ស្វាយរៀង 3A 0536 ខូចខាតយ៉ាងដំណំ។
ចំពោះអ្នកបើកបររថយន្តកុងតឺទ័រ បើកទ្វាររត់គេចខ្លួនបាត់ដោយពុំស្គាល់អត្តសញ្ញាណនោះទេ បន្សល់តែរថយន្តកុងតឺទ័រ ពណ៌ ខៀវ ពាក់ស្លាក ភ្នំពេញ 3D 0286នៅនឹងកន្លែងកើតហេតុ។
បើកបើតាមអ្នកភូមិបានឲ្យដឹងថា នៅមុនពេលកើតហេតុ គេឃើញរថយន្តដឹកអេយចាយមួយគ្រឿង ពណ៌ ខៀវមួយគ្រឿងធ្វើដំណើរពីលិចមកកើតយ៉ាងលឿន ហើយស្រាប់តែរេចង្កូតទៅបុកចំទូរថយន្តកុងតឺន័រដែលបើកបញ្ច្រាសគ្នាលាន់លឺសូរដូចរន្ទះ បណ្តាលឲ្យរថយន្តទាំង២គ្រឿងធ្លាក់វាលស្រែមុខផ្ទះប្រជាពលរដ្ឋមិនទាន់អស់ល្បឿនបន្តទៅបុកតូបលក់ចាប់ហួយ និងដាល់អំបុកប៉ើង និងស្លាកគណបក្សរួចរុលចូលស្រះទឹក ។
បន្ទាប់មកប្រជាពលរដ្ឋ និងសមត្ថកិច្ចជួយហៅរថយន្តសង្គ្រោះដឹកទៅកាន់មន្ទីរពេទ្យបង្អែកខេត្តស្វាយរៀង។
រីឯរថយន្តទាំង២គ្រឿង ត្រូវបានសមត្ថកិច្ចវាស់វែង និងស្ទូចយកមករក្សានៅការិយាល័យចរាចរណ៍ផ្លូវគោកនៃស្នងការដ្ឋាននគរបាលខេត្តស្វាយរៀងដើម្បីរង់ចាំដោះស្រាយគ្នាតាមច្បាប់៕ យឹម សុថាន
