សារព័ត៌មាន នគរវត្ត តែងតែនាំមុខគេជានិច្ច
ខេត្តសៀមរាប៖ កម្លាំងអធិការនគរបាលស្រុកជីក្រែង បានចុះទៅដល់ផ្ទះមុខសញ្ញាតែម្ដង ដើម្បីស្រាវជ្រាវរុករកចាប់ខ្លួន តាមដីការបស់តុលាការ រហូតឈានដល់ឃាត់ខ្លួនបានជនសង្ស័យម្នាក់ រួចបញ្ជូនទៅតុលាការ ចោទពីបទរំលោភកម្មសិទ្ធិឯកជន និងធ្វើឲ្យបាត់ជំនឿលើសេចក្តីសម្រេចរបស់តុលាការ ដែលប្រព្រឹត្តិនៅភូមិល្វា ឃុំស្ពានត្នោត ស្រុកជីក្រែង កាលពីថ្ងៃទី០៧-១៤ និង ថ្ងៃ ទី២០ ខែកញ្ញា ឆ្នាំ២០១៦ ចេញដោយចៅក្រមស៊ើបសួរសាលាដំបូងខេត្តសៀមរាប លឹម សុគន្ធារ៉ា។
ហេតុការណ៍នេះបានធ្វើឡើងនៅវេលាម៉ោង១០និង៣០នាទី ព្រឹក ថ្ងៃទី០៧ ខែសីហា ឆ្នាំ២០១៧ ស្ថិតនៅផ្ទះជនសង្ស័យ ក្នុងភូមិចែកខ្សាច់ ឃុំអន្លង់សំណរ ស្រុកជីក្រែង ខេត្តសៀមរាប។
លោកវរសេនីយឯក ភឹង ចិន្តារ៉េត ស្នងការង និងជាប្រធានការិយាល័យកណ្តាលព្រហ្មទណ្ឌខេត្តសៀមរាប បានប្រាប់ឲ្យដឹងនៅព្រឹកថ្ងៃទី៨ ខែសីហានេះថា ដោយអនុវត្តតាមដីការបស់តុលាការខេត្តសៀមរាប ទើបលោកបានឲ្យកម្លាំងក្រោមឱវាទ អនុវត្តផែនការនេះតាមស្រុក/ក្រុង ជាបន្តបន្ទាប់ ដើម្បីដាក់កម្លាំងតាមគោលដៅល្បាតពួនស្ទាក់ នៅទូទាំងខេត្ត រហូតឈានដល់ឃាត់ខ្លួនបានជនសង្ស័យម្នាក់ នៅផ្ទះតែម្តង ខណៈជននេះបានរត់គេចខ្លួនបាត់ជិត១ឆ្នាំដល់ពេលចូលស្រុកវិញ ទើបកម្លាំងអធិការស្រុកជីក្រែងឃាត់ខ្លួនតែម្តង។
លោកបានបន្តថា ជនសង្ស័យមានឈ្មោះ ស្រី តាំង ភេទប្រុស៥៧ឆ្នាំរស់នៅភូមិចែកខ្សាច់ ឃុំអន្លង់សំណរ ស្រុកជីក្រែង ត្រូវបានតុលាការ ចោទពីបទ(រំលោភកម្មសិទ្ធិឯកជននិង ធ្វើឲ្យបាត់ជំនឿលើសេចក្តីសម្រេចរបស់តុលាការ) ដែលប្រព្រឹត្តិនៅភូមិល្វា ឃុំស្ពានត្នោត ស្រុកជីក្រែង កាលពីថ្ងៃទី០៧-១៤ និង ទី២០ ខែកញ្ញា ឆ្នាំ២០១៦ ចេញដោយចៅក្រមស៊ើបសួរសាលាដំបូងខេត្តសៀមរាប លឹម សុគន្ធារ៉ា។
បច្ចុប្បន្នជនសង្ស័យ ត្រូវបានកម្លាំងជំនាញ រៀបចំកសាងសំណុំរឿងបញ្ជូនមកតុលាការខេត្តសៀមរាប ដើម្បីចាត់ការទៅតាមផ្លូវច្បាប់៕ ប៊ុនរិទ្ធី
